【遊戲感想】劇本精煉系統簡潔《英雄傳說 創之軌跡》結社最終陰謀揭開序幕

 

《英雄傳說 軌跡》系列陪伴了我許多的歲月,每次推出新一集,都充滿期待地開始遊戲,然後爆機一刻,則是抱著各種感慨以及期待的心情,守候著下一集來臨。

雖然 Fans 經常笑言《軌跡》唔會完,連我好幾次親身見到 Falcom 社長近藤季洋先生時,都笑問「到底故事仲要幾多集先玩得完?」,不過,來到《創之軌跡》,也許,我下一次再見近藤社長的時候,不會再問這個問題了。

《創軌》正式將《空》《碧》《閃》很多伏線都收尾了,剩下來的故事,根據遊戲最後段的「隱藏篇章」所說,相信將會「轉彎入直路」,正式進入《軌跡》的最終章了。

 

 

假如你同我一樣,由《空軌》開始就是系列作的 Fans,今集《創之軌跡》一定會勾起你各種複雜的情感,同時亦會因為劇情的發展而感到滿足。

《創》與過往的《軌跡》在編排上略有不同,分為黎因、羅伊德、以及《C》三人以不同視點同時推進劇情,除左幾位新角色之外,今集入面,你可以使用到大部份曾經登場過的歷代角色,對於 Fans 黎講絕對係「大滿足」。

 

 

故事大綱係,喺解決左「黃昏」嘅危機之後,克洛斯貝爾即將再次獨立,但係呢個時候宣誓儀式被騎劫,有人自命為大總統,更嘗試向帝國及共和國挑起戰爭……因為媒體與廠商有協議不能劇透的關係,所以這部份就不著墨太多了。

不過,《創》嘅系統與《閃》有些不同,首先無左與角色累積好感度(即以前類似後夜祭/最後一夜自由活動)嘅設定,所以推進劇情時節奏十分明快;而以往喺城鎮裡面接嘅支線,就擺左去《創》新增嘅異空間「夢幻迴廊」。

 

 

隨住劇情推進,「夢幻迴廊」會解鎖唔同層數比玩家練 Level,同埋收集「封印石」;唔同顏色嘅封印石可以解鎖各種「故事篇章」,可以見到主角以外唔少角色群嘅性格面貌,亦可以解鎖小遊戲,或者進行 VM 卡牌遊戲。

「夢幻迴廊」仲有一項類似抽卡功能嘅設定,玩家收集到嘅銀色封印石,可以用黎抽道具或者魔法珠;簡單黎講,就係將主線以外所有野塞哂入去「夢幻迴廊」。

 

 

經常有網友問,要入《軌跡》坑,係咪真係要由《空軌》玩起?

當然,如果你上 Wikipedia 睇哂劇情先直接開《閃》軌都唔係唔得,但係如果你由《空軌》(3 集)玩起、一直玩埋《碧軌》(2 集)同埋《閃軌》(4 集),黎到《創軌》時,你先會完完全全明白所有角色登場嘅感動、先會為工作室「同時鋪幾十條伏線,埋尾,同時再開伏線」嘅宏大世界觀而感到讚嘆。

 

 

雖然我都明,要由頭玩哂咁多集真係好花時間……但係,如果你鍾意 JRPG 遊戲,《軌跡》呢個坑真係好值得入。

今集係做得非常好嘅一集《軌跡》,無論係劇本份量、節奏等等,都明快而簡煉,遊戲系統亦有「High Speed」以及 Skip 戰鬥過程等等方便玩家嘅選項,所以我寫完呢篇文後,都會馬上返去開二周目衝白金了。

 

 

至於遊戲封面個角色係邊個,大家記得爆機之後,要返去完成埋「夢幻迴廊」嘅第四階段,因為你咁先可以睇到有關下一集嘅伏線同預告係乜。雖然喺過去嘅集數入面,結社、西風呢啲組織好似一直同主角們嘅「正義」對立,但係真正嘅原因同埋陰謀,睇黎要下一集先會開始講解。

 

 

今集故事嘅「導火線」其實亦同《零軌》裡面某件事、以及《閃 4》嘅結局有所關連(蝴蝶效應?),而《零軌》亦已經於 PS4 上面推出左《零軌 改》,有興趣嘅玩家不妨試玩/回味一下。

Falcom 通常每年出一隻新作,站於《軌跡》Fans 立場當然希望佢明年都會繼續做《軌跡》而唔係《伊蘇》(講笑,《伊蘇》我都鍾意玩~),而到底下一集《軌跡》仲會唔會係用《創》嘅名號呢?今次新登場嘅娜狄雅以及斯溫,佢地嘅來歷似乎仲有好多謎底未解,所以未來嘅《軌跡》仍然係充滿令人期待嘅劇情要素喺入面。

 

 

多謝 Falcom,多謝台灣雲豹娛樂,令我可以玩到呢隻《創之軌跡》,我要返去二周目了,謝謝!

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章