【遊戲介紹】心靈世界恐怖探險 《In Sound Mind》超自然力量下戰鬥解謎揭祕

《Half-Life 2: Episode Two》(戰慄時空2:二部曲)年代曾經出過一個備受好評嘅恐怖射擊 Mod《Nightmare House 2 》,佢哋嘅制作團隊 We Create Stuff 喺上年年尾就公佈最新作品《In Sound Mind》,齋睇片都覺得幾唔錯。日前佢哋正式宣佈推出日期,並推出最新宣傳影片。

 

 

《In Sound Mind》係一款心靈恐怖動作解謎遊戲,採用第一身視點。遊戲中玩家喺一棟不可思議嘅建築物走廊中醒來,建築物好似有自己嘅生命,並引導玩家前進。喺過程中不但出現各種詭異現象以及恐怖事件,仲發現有眾多受害者,佢哋有一個共通點,就係都接受咗同樣嘅「實驗性治療」,而且想離開時就發現未能如願,因為你身處嘅地方就係自己嘅心靈世界。

 

 

遊戲中玩家會回憶起一連串令人不安嘅記憶,每段記憶都包含獨特解謎要素、機關、武器與 BOSS 戰。慶幸旅途上玩家並唔係孤身作戰,有一隻叫做「Tonia」嘅貓陪住你,而官方對佢嘅介紹係用「不可思議」黎形容,但係就無明確地表示真實身份係咩,是敵是友真係要玩落去先知。

 

 

《In Sound Mind》預計於 8 月 3 日推出,對應平台為 Xbox Seires X|S、PS5、Nintendo Switch 及 PC Steam、GOG、Epic Game Store,另外 Steam 有提供 Demo 版免費下載。

五木

五木 動漫電玩宅,極愛金田一系列,擅長動作及策略遊戲

追蹤

更多文章