Paradox Interactive 正式發表全新作品《Victoria 3》，為一隻歷史模擬經營策略遊戲，目前上市時間未定，預計將初步對應 PC｜Mac｜Linux（Steam＆Paradox Store）；推出當日會同步登錄 Xbox Game Pass PC 版本。

《Victoria 3》以 19 世紀～20 世紀初為時代背景，時間點約為 1836 年～1936 年，玩家要將手頭上嘅國家發展為現代化社會，並以成為全國各球龍頭為目標。

玩家可以決定自己嘅國家要以邊樣野為發展重點，例如係以農立國、工業為主、抑或社會文化政策優先，隨住玩家選擇有所不同，遊戲推進方向亦會有所分別；同時，面對鄰近國家領土，玩家會選擇以和為貴，抑或一律領兵出戰以擴闊領土等等，都係玩家作為一國之君需要面臨嘅挑戰。

但係就算你揀選「工業行先」，基本農業發展、基本城市建設等等嘅經濟本錢都同樣必須經營，同時玩家亦需要考慮原料輸入、貨品出口等等貿易要點，更要顧及國內人口增長確保有足夠勞動人口，所以《Victoria 3》絕對係一隻極具挑戰性嘅經營策略遊戲。

《Victoria 3》前作《Victoria 2》已經係 2010 年推出嘅作品，雖然市面上有唔少同類型嘅經典作品例如《Civilization》系列，不過《Victoria 2》依然有唔少愛好支持者，混入歷史事件、極多挑戰性任務等等元素，令作品於 Steam 平台上面一直獲得壓倒性好評，因此呢隻即將推出嘅《Victoria 3》相信都係玩家值得期待之作。

《Victoria 3》初步對應 PC｜Mac｜Linux（Steam＆Paradox Store）；推出當日會同步登錄 Xbox Game Pass PC，正式發售日有待公佈。