【遊戲介紹】極重動畫感獨立作品 《Sable》於廣闊沙漠開放世界展開冒險

近年超重動畫感嘅遊戲首推一定係《二之國》,如果鍾意呢種風格遊戲嘅朋友就要留意啦,日前倫敦獨立工作室 Shedworks 透過外媒 IGN 發表佢哋製作中嘅作品《Sable》實機片段,畫面線條雖然無《二之國》咁細膩,但係仍然有非常重嘅動畫感,值得留意。

 

 

《Sable》係一款解謎冒險遊戲,採用第三身視點,開放世界。遊戲中玩家扮演女孩 Sable,喺一個被沙漠覆蓋嘅未知星球中探索。透過搜索廢墟、古代紀念碑、墜毀太空船殘骸等地方了解星球並與荒漠中其他流浪者相遇,同時揭開失落已久嘅謎團。

 

 

今次實機影片主要係展示一個似係初期階段場景,過咗基本操作教學之後就入到營地同當地居民互動,對話中有回覆選項,根據之前嘅資訊,遊戲會因應角色回覆而產生一定程度嘅改變。傾完計之後就騎喺一部類似電單車嘅機械,最後進入廢墟並獲得特殊力量,暫時未有戰鬥相關資料。

 

 

另外遊戲創意總監 Gregorios Kythreotis 係 Twitter 上面講到《Sable》刻意將遊戲降為 30fps,而且仲搵緊方法將遊戲降至 24fps,即使遊戲本身係用緊 120fps 運行。佢想咁做嘅原因,係希望透過抑制幀率,實現整體更接近動畫表現,因為一般動畫多數都係用 24fps 製作的。

 

《Sable》預定於 2021 年上市,對應平台為 Xbox Series X|S、Xbox One、PC Steaam,支援日文字幕及介面。

五木

動漫電玩宅,極愛金田一系列,擅長動作及策略遊戲

追蹤

更多文章