橫向動作玩得多，秘魯風格嘅橫向動作你又玩過未？新作《Imp of the Sun》官方強調佢哋嘅場景同角色都係精心手繪製作，當中深受秘魯文化啟發，參考各個不同文化結合而成，可謂充滿異國風情，市面上亦比較少見。

《Imp of the Sun》由獨立團隊 Sunwolf Entertainment 開發，係一款傳統橫向動作遊戲。故事講述太陽喺好耐之前被四位守護者偷走力量，令世界陷入黑暗永無止盡嘅日蝕，而太陽喺垂死時以最後嘅力量創做出主角「Nin」，為咗恢復大地嘅光芒，於是踏上奪回力量之旅。

戰鬥方式同一般動作遊戲差唔多，都係攻擊+回避打法，可以腳踩敵人（類似《Mario》），擊敗敵人後可解鎖新能力，暫時已知會有五隻 Boss 供挑戰。遊戲模式除咗故事模式外仲會有時間挑戰、勁黑嘅日蝕模式等等。另外本作場景、角色都係參考自秘魯文明，玩家會見到安第斯山脈、亞馬遜叢林等地方，而隱藏嘅 21 種獨特物品亦係根據安第斯文化真實遺物所設計，有根有據。

《Imp of the Sun》預計於 2022 年上市，對應平台為 PC Steam 及 Epic Games Store。