【遊戲介紹】真人快打溝馬里奧《IMMORTAL: And The Death That Follows》動作表現富特色充滿電影感

極多暴力畫面嘅《真人快打》（Mortal Kombat）同合家歡嘅《Mario》系列理論上係風馬牛不相及，不過喺早前宣佈嘅新作《IMMORTAL: And The Death That Follows》就表明將兩者融合溝埋，雖然係宣傳影片入面就見唔到主角食菇頂問號，但係動作表現就充滿電影感，都幾有特色。

《IMMORTAL: And The Death That Follows》由 Mishura Games 開發，係一款輕度 Rouge 橫向捲軸格鬥遊戲。遊戲中玩家扮演一位因背叛而入獄嘅半神 Fudo，為咗逃離呢個跨維度監獄，組織自己嘅幫派與追捕你嘅敵人戰鬥，主要都係見慣見熟嘅大路野。

遊戲主要嘅賣點係玩法同戰鬥部份，根據官方所講，平等地融合《馬里奧》同《真人快打》元素，即係同時加入橫向捲軸動作同格鬥遊戲嘅玩法。喺影片中所見，有類似「Blocking」格擋系統，連擊 Combo 演出亦夠晒暴力，的確幾有《真人快打》味，而且所有戰鬥將會係以自由流動形式進行，將會無縫且流暢，玩上手應該幾爽。另外，玩家可以創作新嘅動作同戰鬥風格，敵人亦會跟住你一齊升級，幾有挑戰性。