遠在 2013 年，Lunar Software 曾經發表一隻科幻生存恐怖遊戲《Routine》，當時不論畫面定概念都非常吸引，令玩家非常期待，但之後就無晒消息，甚至有玩家以為隻 Game 已經終止開發。不過喺琴晚 Summer Game Fest 直播節目驚現新片，並且公佈埋對應平台。

《Routine》背景設定喺未來嘅廢棄月球基地，不過呢個「未來」同我哋所認知嘅有啲唔同，因為佢係模擬返八十年代人所「諗」出黎嘅未來，所以喺遊戲入面你會見到有 Floppy、仲係用緊大牛龜顯示屏、屏幕顯示顏色數量少等特色。

根據官方解說，玩家喺一片死寂嘅月球基地中，要四處探索尋求生存之道，並解開月月球研究站人員全數神秘失蹤嘅謎團。同一般生存遊戲唔同，本作面對敵人只能用逃跑、躲藏，萬一真係走唔甩就只能用手上嘅無攻擊力嘅「CAT」射擊敵人暫時打停敵人趁機走佬，非常刺激。另外，遊戲採用非線性設計，玩家可自由四處探索，更添恐怖感。

《Routine》暫未有發售日期，對應平台為 Xbox Series X|S、Xbox One 及 PC Window & Steam，並會包含在 Xbox Game Pass。