【遊戲介紹】像素風格有趣小品《RandoMine》Roguelite 挖礦動作解謎冒險遊戲

又有一款支援多人合作嘅 Roguelite 小品動作遊戲發表，新作《RandoMine》有輕鬆幽默嘅背景同美術，戰鬥系統就簡單易上手，係一款適合任何年齡玩家嘅作品，預計下年推出，全平台都有得玩，啱嘅就 Mark 定落 List 啦！

《RandoMine》由 Bitmap Galaxy 開發，係一款 Roguelite 動作解謎冒險遊戲，支援多人遊玩（但未知最大可幾位玩家同遊）。故事講述四位英雄啱啱升級做半神，去天空酒館慶祝時，因為太盡興搞到成間酒館爛晒，酒館主人一怒下將其中一位英雄變成一隻驢子，想救返佢就要去各地嘅礦山挖礦還債。

玩家可操作剩低嘅三位英雄（仲有隻變咗做驢子），佢哋分別手持十字鎬、鏟同鑽頭三種工具，除咗用黎挖礦之外仲要用黎戰鬥，而且每種武器都有優劣之處。例如十字鎬高攻、鏟有長攻擊範圍、鑽頭則有高速挖礦效果，加上每位英雄嘅獨有技能，鑽工可以掉炸彈、鏟工可以飛鏟，玩落會有唔同樂趣。

由於係 Roguelite 類型，礦山迷宮每次進入都會隨機生成，內部結構與敵人位置都有所不同，同時更會有大量解謎以及陷阱。透過挖掘地面及牆壁可得到礦石，有機會發現隱藏寶物或房間，增加挖掘嘅趣味。另外，類似其他 Roguelite 遊戲，玩家可透過收集到嘅資源去幫角色進行強化，解鎖新招、增加敵人掉落金錢、回復道具增加等被動技，而呢類技能會永久存在，可慢慢累積「農」上去令探索過程更容易。