近期大愛炒冷飯嘅 Square Enix 宣佈即將於 2018 年 12 月 6 日在 PS4 上推出 RPG《THE LAST REMNANT Remastered》，呢隻遊戲首次推出時為 2008 年。雖然係冷飯，但係當時對應平台為 XBox 360，而我當時係 PS3 派的……如果你同我一樣未玩過呢隻遊戲，或者今次呢碟冷飯，你會同我一樣覺得好香好好食！

遊戲裡面嘅世界，一共有四個種族，大家都在利用「Remnant」嘅力量，甚至想支配佢，結果導致人心迷失，戰禍頻起；呢種狀況維持左一千年，而主角，就係生活喺呢個時候。

遊戲戰鬥系統採用遇敵回合制，玩家可編成人數最高五人嘅隊伍，以指令輸入模式進行戰鬥；比較有趣嘅係遊戲並唔係玩角色升級練厚血磨怪，而係偏重於玩家如何使用技能以及道具搭配去取得勝利，就咁聽似乎吸引左唔少同廠《SAGA》系列嘅元素喺入面。

作為一隻典型嘅日系 RPG，支線當然亦都係遊戲中一大重點，如果玩家非常懷念 2000 年代嘅 RPG 感覺，呢隻遊戲應該會好適合你懷愐！

不過既然係 Remaster 版，系統上面當然亦有改良，例如戰鬥時仲可以用雙倍速節省時間、購置裝備道具時，仲可以預覽著上身時嘅設計等等；比較過癮嘅係，Xbox360 年代嘅「頭目七人眾」，今次玩家可以喺遊戲中以僱傭兵形式請佢地幫你打怪 LOL

至於本文題目中提到嘅畫面表現，SE 好貼心咁為玩家做左一條片黎直接睇比較，雖然一定比唔上而家新鮮熱辣嘅新 Game 畫面，但係作為一隻高清作品黎講，我都算收貨啦。

遊戲將於 2018 年 12 月 6 日在 PSN 發售，數位版限定，定價 3,980円。遊戲宣傳影片及畫面比較影片如下：