好多人開頭玩唔係下下殺波殺落網度就係比對面殺到飛起，其中一個主要原因係摸唔準按鈕時機，咁呢度講少少慨念，殺波基本上係起跳後越遲出手越大力，Perfect Timing就會有破風效果出現，但係相對地越遲出手打落網既機會亦都越高。
呢度提供兩個辦法可以比大家試下:
1.角色準備出手前會講野，講完野之後就撳制就差唔多架啦
2.睇動作，當角色儲力到最滿果陣，成個人會有好短時間硬晒，又或者可以睇成係起跳到最高點騰空果陣，呢個時候一野殺落去就啱晒！
好啦！咁到防守果陣記緊三部曲！第一步按 O 接波，跟住就直接衝上去網前等電腦Set波比你殺。但係如果係電腦接波既話就要等個波到果陣撳正方制，再等佢殺波，呢啲係排球基本功，練熟就可以睇埋進階版！
進階技巧就要係殺波前走位，因為當你係邊個位起跳係會影響之後你殺波既方向。走位既目標得一個，就係攔網者既正面！當起跳後就要留意對面有無蹲下，如果佢蹲既話即係佢打算攔網！咁你就唔好撳 X 殺波要改為撳 O。如果佢無動作就唔好猶豫，殺爆佢啦！而殺波果陣亦都需要撳左邊蘑菇改變殺球方向，最理想就係殺對面兩個人中間空檔位會易拎分啲。
好啦，上面講咗咁多有個重點要記住，就係盡量自己接第一球！咁樣先可以做到波比自己殺。萬一接唔到第一球，咁你就要Set波比電腦殺，咁就記得記得要將個波Set去無人檔果邊，電腦就會走位去殺，而對面就會有高機率進入發呆狀態。
VJGamer總編，細細個已經蒲機舖，機齡甚深，熱愛電玩文化。