沒有「香港眾志」的《鐵血武林》

202

近排除咗手遊星矢終於開咗金牛到獅子宮任務之外,又有隻game想講下。

隻game就係Gameone智傲集團嘅懷舊武俠遊戲《鐵血武林》。小弟外號「太極張宇人」,自細住睇太極張三豐嗰份真正嘅「仙氣」長大,大過又俾喬大筆下嘅《武道狂之詩》人物姚蓮舟吸引,中晒劇毒,於是,開game就用咗武當囉。

首先,個系統真係幾毒,好似個武功升級系統,令你有衝動想儲晒全部武功,以前玩過《九陰真經》,就算被人追殺,嗰份衝動,都無咁強烈;小弟無乜錢,只能抽中琴棋書畫四招套路,中間夾招「逆運真經」防毒同「普陀杖法」,有高手玩家話,最後應該本門武功無乜用,去到最後勁嘅都係吸血、吸內、補血、落毒…目前是的,不過小弟仲係江湖小魚兒,本門招數仲係二、三階,要親身試試先知龍與鳳。

12970461_10153336641855927_568623838_o

目前我認為最好玩嘅元素有三樣,第一係招式deck自己set,前後互換真係有好唔同嘅效果,例如你想加攻先定減對方聚氣先?上毒定補血?都係完全自己話事;第二就係個pvp,食花生者都可以賭一舖邊個贏,十六強、八強、四強,場場買都得,唔參賽都有得一齊玩呢下,係好貼地;第三就係個幫朋友運功打通任督二脈,八個朋友一齊幫你打通咗,你又俾錢答謝番人,而唔再只係硬食啲乜乜道具,呢點喺手機game嚟講,互動合作算係唔錯!

12991816_10153336642755927_1256665447_o

高級抽蛋無得免費、唔夠傳神嘅語音,係有少少美中不足…但如果無以下呢個缺點,身為武俠迷嘅我,真係想俾滿分。

之咪就係當我想成立幫派嘅時候,出唔到「香港」呢兩個字…仲要同我講,「『香港』是非法字元。」試咗好幾次,都唔得,作為香港人玩香港game,聽住粵語長嘯一聲:「武當長拳﹗」嘅時候,得知真相時,係有少少失望。背後原因,我估可以有好多,例如真實地名唔得,但嗰一刻,我無再深究了…於是,就成立咗該伺服器內第八個幫派「香城眾志」,用「香城」取代咗香港。

13000588_10153336642880927_2114274199_o

「香城眾志」無資金繼承,只係小弟一開始捐咗100個元寶,舵主都係邊個想做就做,點知轉眼間就入爆人,快到high high。點解會咁快呢?調查咗一晚,終於知道原因,就係成立幫派時,至少要100萬錢同2000元寶,根據匯率,即係至少要港紙300蚊先可以開到幫派,門檻高到咁,靠自己籌棋,一定開唔到個字頭。

無論如何,幫派開咗,都想經營落去,無理由開咗又唔認真玩,只係如今想買都永遠用唔到「香港」呢兩個字,縱然眼前嘅武林有幾輝煌(或者日後有高手靠北冥神功稱王稱霸),但口袋裡的紛爭同勇武,永遠都係同「香港」無關。

性暗示星矢

討厭傲嬌雅典娜;《無雙大蛇》兩代全角色滿級嘅男人。近年沉迷足小遊戲,成立足小研究所。

追蹤

更多文章