《美國隊長 3：英雄內戰 (Captain America: Civil War)》作為 Marvel電影世界 (Marvel Cinematic Universe)  Phase 3 第一部作品就大亂鬥一番，初宣佈基本上大部份Marvel漫畫迷都不太睇好。原因好簡單，明明大亂鬥結果得6個打6個 (初公佈係得5打5咋)。話晒我地最少都想睇到呢個陣容啊！

今次故事就圍繞住 Avengers 多次「大型」救世行動後，不少人民受害，聯合國出手要求所有 Avengers 成員簽署條約，由私人機構變聯合國管理。啫係就算整水喉，佢話要你整就要整；如果外星人再打到嚟，我係唔比你行動就唔比你，你出手我就拉你！
作為Ultron(奧創)搞手嘅 Tony Stark (Iron Man) 衰過鑊大嘅仲唔死狗咁話簽啦，但係大美國主意要造福人群嘅 Steve Rogers (Captain America) 真係採你都有味。一個團體意見分歧講唔掂咪打囉，不過打得大鑊啲啫。
當然真正開打原因唔係咁啦，說到尾其實只係 Tony 同 Steve 爭仔，新歡舊愛你懂的(笑)。點解爭為咩爭就自己睇，講左費事你話我穿橋。

不過經過多年MCU洗禮，話到明漫畫還漫畫。你理得我電影點改啊，我改到「Mandarin (滿大人)」變蠢人變戲子都得啊，吹咩！

不過今次有好多位值得大讚，例如：用快刀斬亂麻式交代新角色「Black Panther (黑豹)」；文場、打鬥節奏配合得非常好；動作設計比《美國隊長 2》更精美。最大讚點一定係 Spider-Man ，係暫時電影所拍過最接近漫畫原本設定嘅 Spidey。一句夠煩膠，煩得我地好舒服！

總括而言，抱住一向MCU系列都係兒童向商業英雄片心態入場的話，今次都係收貨有多。而且一如Marvel作風，每次都喺預告刪咁啲等你入場有驚喜。今次都唔例外，就算預告都穿埋話你知有Ant-Man同Spider-Man都好，你都會有野值得你拍爛手掌。