《VJGamer教教你》乜野叫做 Gaming Mon！

之前上海舉辦DOTA2 既世界錦標賽錯漏百出就係人都知架啦 (唔知既可以睇呢度)，但係講到尾又有幾多人知道乜野叫做專業電競設備呢？而家周街都話自己係 1ms 就係Gaming 專用，其實係咪就咁印個 Label 話自己係 Gaming 就得，答案就梗係唔係啦，今次我地就簡單列舉部份條件，講下乜野叫做 Gaming Mon ！

示範影片係用 BenQ Gaming Mon 既 (鬼叫人地係而家大部份電競比賽專門牌子咩)，其實人地都好清晰咁講咗最最最重要一樣元素係乜，就係速度。咁啲人成日講既「1ms」其實就即係面板既反應時間 (呢樣野越快越好啦)，亦即係1千微秒 (1000份1秒)。基本上 1ms 對 Gaming Mon 黎講係屬於最低要求，對一般家用機 (Xbox / PS4) 黎講已經夠用。而一般文書 Mon 同電視就大約係 4ms – 12ms，如果係一般 IPS面板既就更慢 (IPS 面板既優點係畫面表現好靚，但係普遍反應速度比較慢 )，所以買 Gaming Mon 見到寫住 IPS Panel 基本上都唔洗點考慮架啦，咁當然如果閣下只係追求畫面又唔介意有鬼影既就另計啦。

5ms 就會咁

而另外一樣速度既指標就係 Refresh Rate啦，你見到好多專業電競 Mon 會寫自己係「144Hz」既，就即係佢既每秒鐘畫面更新頻率達到 144 次！一般黎講，當呢個數值越高，畫面就會越順，越低畫面就會越卡下卡下咁，所以點解當你玩PS4 版本 Division 之後，再玩返 Rainbow 6 既話就會覺得好順，原因就係 Division 鎖咗 30Fps (frames per second)，而 Rainbow 6係行緊60 Fps既，當中30 Fps 既差異就會令你有咁既感覺啦。一般家用機只係可以用到 60Hz，所以再高都無乜意義，但係 PC 方面就可以用到 144Hz 以上。而現行基本上 144Hz 已經係最高既規格黎 (當然實際上有話自己 240Hz既，但係仲有分輸出同輸入架)，而且仲有唔少品牌係用晶片強行爆大個數到 144Hz，但係就會導致有偷 Fps既後果。

144Hz vs 60Hz

咁除咗速度之外，唔同既廠商都會為佢地既 Gaming 系列加入一啲毒有既功能，例如「Motion Blur Reduction」係幫你減少動態殘影問題，「Smart Scaling」就係可以改變比例去符合返一啲舊遊戲啦 (CS1.6 又或者以前 Saturn，超任等等係使用 4:3 畫面比例，如果用而家 16:9 去睇就會拉長咗啦)。仲有部份有名既電競品牌例如：BenQ，Eizo 等等會針對唔同既遊戲設有唔同既模式，例如：Fighting Mode、RTS Mode、FPS Mode 咁。好似啱啱完咗無耐既 Red Bull Kumite 就係用針對格鬥 Gaming 開發既 BenQ Gaming Mon啦。

唔同牌子都有針對自己既特有 Game Function

其中有樣就好值得講既，個人認為係 Gaming 必備既功能就叫「Black Equalizer」，當初我聽到都完全覺得係開 Cheat 既 Function，佢既功能其實非常簡單，就係幫你係黑媽媽既地方自動補光，即係玩槍 Game 果類遊戲你唔洗諗住可以匿埋係陰影位囉，完全屈機到裂！