差唔多係女性專用 Game既 《戰國 BASARA》即將會出第一隻以單一武將做賣點既作品《戰國 BASARA 真田幸村傳》，係最近一期既 ファミ通上面終於肯講幾時出啦，作品確定會係今年既 8月25日推出，會有 PS3 / PS4 版本。

今次呢隻《戰國 BASARA 真田幸村傳》係圍繞住日本第一型男系列既代表武將「真田幸村」為主題，號稱會以更接近真實歷史既角度 (BASARA 接近真實……嗯)，描寫信州出身既鄉下武士係點樣熱血地燃燒佢既小宇宙既傳奇故事。

目前已知可以操作既登場角色有「真田幸村」、佢老豆「真田昌幸」、佢大佬「真田信之」佢宿敵「伊達政宗」仲有童年版既「真田幸村 – 弁丸」同「伊達政宗 – 梵天丸」。戰役方面暫時就只係公佈咗 4關，分別係「芽生えし蒼紅の魂」、「武田壊滅 天目山の戦い」、「六文銭誕生」、「第一次上田合戦 徳川来襲」。

另外《戰國 BASARA 真田幸村傳》係會有 PS4 既中文版，亦係《戰國 BASARA》第一次有中文化，但係就未有推出時間，有消息再同大家講啦。

GamePlay 畫面