官方今日就發佈咗黎緊係 3DS 平台推出嘅 《Monster Hunter Stories》實機遊戲片段，今次內容大概講去冰山偷蛋然之後再遇到電龍發生戰鬥。
今次遊戲畫面睇到玩家要跟據地圖環境轉換魔物黎移動，每隻魔物都有特殊技能，例如碎岩、攀登等技能，片段見到玩家要轉換大海龍黎遊水過河，成件事好 Pokemon。
遇到敵人會進入戰畫面，詳細戰鬥介面介紹可以去呢度睇，戰鬥途中可轉換魔物戰鬥，當見到羈絆值計量表累積滿咗後，就可以出大招，畫面相當華麗。中間某d攻擊仲會觸發「鬥波」情況，戰鬥玩法唔係單純回合制咁簡單!
睇完成條遊戲畫面都覺得呢隻 game 唔係 hea 整，戰鬥雖然由以前即時狩獵變咗回合制，但係回合制之中加入好多獵人 (精靈訓練員) 同魔物之間嘅合作，感覺上唔單調有新鮮感，畫面又幾華麗，獵人fans可以一試!
足本遊戲片段
《Monster Hunter Stories (モンスターハンター ストーリーズ)》會係 10月 8日上市，3DS 專用，遊戲售價為 5800 日圓，6 月 2 日就可以預訂，另外有 MHX Save既玩家會有連動特典。
幪面超人頭號粉絲，玩具figure 無一不歡，極喜歡玩潛入式遊戲。怎吃也不胖，只因最喜歡「食字」﹗人生座右銘是「自作樂，很快樂」。