為咗一個星矢夢，早前去咗睇星矢30週年展，有啲感受想講。

《聖鬥士星矢》嘅故事，來來去去都係咁，瞓低起身瞓低起身，一二三、出絕招、打大老，新故仔其實唔多，故事數量要比《龍珠》、《超時空要塞》、《機動戰士高達》等作品簡直算少。星矢於冥王篇漫畫完結後沉寂一時，後來電視版一出，加上中途有非正統嘅《冥王神話》助攻，先挽回人氣。

冥界篇經典場面

可以著上身玩對戰既聖衣

正因為來來去去幾格漫畫，fans睇熟晒，自然顯得30週年展覽中展出原畫嘅迫力。老實講，細個睇星矢，集中欣賞聖衣設計同熱血故事，同埋書尾啲聖衣架（埋下購買「聖衣神話」嘅禍根），一般讀者如我，係唔會諗到要睇畫功，之不過今次原畫展，又真係令人眼前一亮——原畫中爆聖衣同埋出招線條，原來咁有迫力，另外見到雙魚座阿波羅狄原畫之時，令人由衷地認同，佢真係一位「美戰士」。原畫展，令星矢迷有重新接觸經典作品嘅感動。

原畫展現場分兩邊，左面係五小強嘅進化歷程原畫，並以齊集在女神像下的封面作結；右面係由十二宮到海皇篇，至於冥王篇嘅原畫就唔多，似乎係留有一手，下次再搞。除咗上述嘅雙魚座原畫，處女座、雙子座、金牛座等原畫都有喺現場，只不過展覽無一幅沙加對撒卡、卡妙、修羅一幕，就有啲可惜。（仲有無《真紅少年傳說》）

亦因為咁，現場重製嘅OP就更注目，因為舊畫新造，易有共鳴，加上畫面水平已經有睇緊《Fate/Zero》嗰個級數，分鏡保持原有嘅超高水準，而唔係《龍珠超》新得嚟又無咗回憶嗰種，新OP自然贏到唔少掌聲。當然，12 座黄金聖闘士等身大立像同虛擬著聖衣，又係一大個呃like嘅賣點，其實都好吸引，但原畫珠玉在前，立像反而無咁重要了。

30週年星矢展，8月會喺香港搞，一班星矢迷好自然希望有番啲香港元素，筆者有以下建議：

– 粵語新OP

搵香港人配新OP「無敵o既聖衣　金光璀璨好美麗 唔係鐵　係聖衣　著左打都打得勁D」

– 原畫行先

香港展場地方細，如果拎晒黃金聖衣來，排隊影相一定排到唔知去到邊度。個展覽唔係想fans睇畫功咩？希望會有未睇過嘅畫運來香港。
– 搵番 《真紅少年傳說》班本土配音

好記得有一句，「星矢，你可以收工了。」

– Cosplay區

今次睇等身大嘅經驗同我講好悶，如果有真人著上身做下pose畀人影下相就好了。

– 請準備充足紀念品搵fans錢

今次幸運地買到全日本最後一件沙加tee，其他都好想買，例如雙魚tee（心口玫瑰圖案可變色），但一早賣晒。