之前 7月尾果陣係 Playstation 官方 Blog 果度就曾經講過會有呢個更新，不過就無透露過今次既重大更新具體係啲乜黎，當時有得登記申請 Beta 資格 (System Update 都要玩 Beta……)，如果中咗既朋友今日應該會收到 Email架啦，而抽唔中既都唔洗灰，啱啱 Playstation 就公佈咗今次重大更新既內容係乜啦！

今次呢個更新代號叫做「SHINGEN」(信玄)，順帶一提之前既代號( 2.0政宗，2.5幸村，3.0謙信，3.5武藏)，而今次更新具體既功能就包括：

UI更新

主要係做咗一啲調整，例如新既背景系統、修改過既「What’s New」標籤，仲有彈出黎個通知同埋一啲系統 icon 重新設計，不過 UI 整體感覺就唔會有太多變化，你可以當佢係換咗個 Skin 咁啦！而呢啲改動都係想令用戶覺得更加易用啵，但係彈出黎個格仔唔夠阻定既話我點無限邀人？

PS Quick Menu

本身撳個 PS 制就會入既 Quick Menu，終於識得改做唔係彈出去主畫面啦！新版既 Quick Menu 只會佔據你個畫面既一部分，唔會再係成個畫面跳出去，而且係 Quick Menu 仲加多咗幾舊野，分別係好友狀態、快速加入 Party、群組、社區，而且最正既係呢堆野可以根據你自己既習慣黎進行自訂，呢樣堅正！

Share Menu

同 Quick Menu，新版撳 Share 之後都唔會成個畫面彈出去啦，好似下面幅圖咁只係會佔畫面既一部份，同時仲會記住你上一次分享既社交網絡設定，慳返唔少時間！而且新版 Upload 上 Twitter 影片既長度由原本既 10秒大幅增加到 140秒，抵讚！

新增文件夾功能及內容庫更新

PS 回應玩家既功能，係新系統之下，可以開 Folder啦，以後自己玩開邊類型既 Game，用開邊類型既 App 就可以分晒類，唔洗搵餐死！而係個 Library 入面仲會加多個「已購買」既 Tag，入面會有晒你買過既 Game，App同 Demo。而本身用緊既「遊戲」同「應用程式」就會變成只係系統入面有安裝既野。除咗呢樣之外仲會有個新既排序工具，可以照購買日期、安裝狀態黎 Sort，仲會有埋打字 Search 呢樣野添，越黎越似電腦……。

文件夾作成

獎盃系統改良

新既獎盃系統將會有 Offline 查閱功能，更新後將會有一個「離線模式」揀，無 Online 情況下都可以 Check 到啦 (香港有幾多機會無 Online……)。

另外仲會多個功能係 Check 到隱藏獎盃，新系統之下可以揀選顯示隱藏獎盃既名同相關信息，但係因為本身隱藏獎盃係默認唔顯示既關係，所以都係要手動去撳咗先。

而獎盃既顯示方式亦都會改變，新既顯示方式係類似金字塔咁，以稀有度黎排列。

玩家資料顯示調整

新版本下既玩家資料會更容易睇到相關信息，例如可以直接睇到你同對方既獎盃進度對比，仲可以幫自己資料果頁改背景圖案，好適合大家刷存在感。

最尾官方聲明就話正式版仲會加更多功能落去，但係又懶神秘咁唔講具體幾時發佈，淨係話「in the coming weeks.」，即係叫你地再等下咁囉。