之前我地介紹過既桃鐵復活作《桃太郎電鐵 2017 奮起日本！！》係日前終於開放咗官網，同時更加發放咗正式發售日期同支援人數等等既消息。根據官方資料正式上市日期係 2016年既 12月 22日，而遊玩人數為 1-4人，售價為 5378 日圓！
咁《桃鐵》系列就係一款大富翁類似遊戲黎，主要目的係營運鐵路公司並成為日本第一。而對上一集已經係 2010年既作品。(詳情請參閱 正阿喂《桃太郎電鐵》復活！新作登場！！) 今次仲係
桃鐵之父佐久間晃同一班舊班底親自做返隻 Game，絕對係信心保證！
遊戲同舊版差唔多，都係以鐵路做棋盤，買地起樓炒股呢啲野當然唔少得啦，而肥仔窮神「ボンビー」亦都會登場 (喂我好掛住佢丫！)，窮神主要係比啲負面狀態大家，例如扣錢阿，燒卡等等。咁當然桃鐵最引人入勝既賣點：突發事件係本作將會重現，即係各地既名產怪同歷史人物都會登場幫手既。
咁發售之後官方就會有個對戰專用軟件免費下載，透過呢個軟件只要你有 1 隻 Game 就可以 4 人連線玩「桃鐵 3 年決戰！」多人模式。《桃太郎電鐵 2017 奮起日本！！》將會於 2016年 12 月 22 日正式發售上市，遊玩人數為 1-4人，平台為 3DS。
回帶相關文章：
VJGamer總編，細細個已經蒲機舖，機齡甚深，熱愛電玩文化。