Xbox One / Win 10 超級大作《Gear Of War 4》試玩評測

11月 25號 Xbox One S 香港行貨就正式推出啦,老實講淨係買佢 4K UHD Bluray Player 都已經抵到爛,咁買部機返就梗係睇埋有咩 Game 啱玩啦,今次介紹既超級系列大作《Gear Of War 4》真心的確係極有水準之作,作為出機之選絕對唔會後悔!

4d792e71-88d8-41a9-bf1c-a2ef7fa87c3a

 

今次 GOW4 由 The Coalition 開發,而且係是第一隻原開發商 Epic Games 無共同參與既作品。同時亦都係系列第一隻 Xbox 同 Window 二個平台同時發行,所以呢篇評測就算無 Xbox One 都啱睇,老實講我覺得用 PC 玩仲順手咗添 (雖然有 d Lag)……

gears4_e3_2016_7_kait_knife-9bdacff613214b6399dc59601be4bf3c

 

遊戲主要分為三大模式:基本故事 Mode,玩合作生存 50波既持久戰,同其他玩家 PVP 既對戰模式。基本上可以滿足晒 PVE / PVP 玩家,而且三個 Mode 都整得極有心機,絕對唔係求其整差唔多野出黎 Hea 果d Game黎。

 

先講故事模式,畫面表現極佳呢d廢話唔寫啦 (今時今日有邊隻大作敢做得唔靚丫……),故事亦都唔需要擔心,假假地 GOW 系列都有出小說,故事背景極為龐大,所以故事內容就唔多講啦。主要想講既今集故事節奏、關卡設計、場景既舖排等等都拿捏得非常準確,而且每 Part 都睇得出係有用心設計過,絕無欺場。呢度建議一下如果純粹想享受劇情既話可以揀簡易難度黎玩,相信你會好似睇戲咁享受,文戲同動作場面都交晒功課,未接觸過 GOW 既我驚你想玩返之前幾集添阿!(打瘋狂難度前要有心理準備,堅難的)

 

20-11-2016_1-34-40

Fans 見到 Marcus 重出江湖不知幾滾動!

 

20-11-2016_1-34-01

追逐戰極好睇!

20-11-2016_1-34-17 20-11-2016_1-33-47

20-11-2016_1-33-37

 

咁跟住就係今集重點之一:持久戰。

呢個模式總共會有 50波,每一波之間會有大約 30秒時間準備,而每次去到整數關卡就會係 Boss戰,基本流程就係每 1-9波累積武器同能量分數然後係裝配機度買防禦設施,然後就迎擊每10波出現既 Boss 關,呢點同之前集數分別不大。

2016-11-21_162650

 

重點黎啦,今集持久戰同以往最大既分別主要有2點:新增職業以及技能卡牌組。呢2樣元素令到持久戰同以前有極大分別亦都貼近現今既玩法!

17-11-2016_0-44-35

 

新增職業有5種,分別為士兵、重裝兵、偵察兵、工程兵、狙擊兵5種。每種職業各擅長一樣野,例如工程兵起塔會平啲塔血量多啲、狙擊兵爆頭威力有加成及可以標記敵人、士兵係唯一可以使用雷明之錘既職業等等。每場都需要唔同職業配合去達至最佳殺敵效率,而且每個職業經驗值都係分開計算,當到達一定等級就可以攜帶多一張卡片技能,所以當然越高 LV 越勁 (廢話),耐玩度一流。

 

17-11-2016_0-44-58

每個職業有自己專屬牌組

 

咁技能卡牌組又咩黎呢?當完成完成持久戰或者對戰之後都會得到相應既 Coins ,儲夠就可以開箱。透過開箱可以得到對應唔同職業既技能卡牌組,當抽到相同卡牌而又到達需求數量即可以為卡牌升級,透過卡牌升級加強角色能力令你更有可能打贏50波。

 

17-11-2016_0-44-50

當重複卡達到數量需求即可升級技能

 

17-11-2016_0-44-43

或者可以碎鬼咗佢儲錢做卡

 

17-11-2016_0-44-29

當然你可以課金啦……

 

17-11-2016_0-44-09

仲會抽到武器或者人物 SKIN

 

17-11-2016_0-43-50

夠錢可以 Unlock 特別角色

 

 

有咗上面2樣新元素之後令到持久戰變得極為好玩,因為以前既持久戰大家都只有過到與過唔到,你打100次都好過唔到就過唔到,都幾 Sad。不過有咗職業同卡牌之後就可以提升隊伍既基本能力,遊戲亦都變得有目標。

 

咁呢度都提供少少持久戰既建議比大家啦,隊伍組成 1個重裝兵,2個偵察兵,2個工程兵。各自配帶技能如下:

 

重裝兵:

炮臺傷害,標記傷害

 

工程兵一號:

修理加速,炮台生命值 (最好有 5LV),炮台折扣

 

工程兵二號:

修理加速,障礙物生命值,障礙物折扣

 

偵察兵:

存放獎勵,生命值提升

 

整個流程記住由工程兵一號負責起砲台,二號負責起路障同埋誘餌,偵察兵就負責去執能量為基本分工。另外設記前中期唔好亂升路障,LV 2 已經夠做,如果你手痕升到電網既話你之後好容易會唔夠錢修理,而且隨便幾隻爆雷蟲 / 大怪要拆你係無難度。另一樣好多人忽略既係誘餌,誘餌升到 LV 3 之後其實好鬼死硬,修理又平,建議善用。仲有就係記得殺淨一隻小怪比時間隊友執裝執能量,新手最易犯既毛病之一。

2016-11-21_164008

 

最後就係超級極耐玩既 PVP 對戰模式,對戰模式入面又再細分為幾種類型 (咪又係見到人就殺),當中個人覺得最好玩既係俗稱「隊保」既隊長保衛戰。

20-11-2016_1-34-59-1

 

係呢度特別要為未接觸過 GOW 系列既朋友講解返少少特色。GOW 系列同其他槍 Game 主要有幾點分別:第三身視點、極著重個人技術、主打近距離對戰。

 

同其他競技類射擊遊戲唔同,GOW 採用第三身視點,同其他主流射擊 Game (CS:GO,Rainbow 6,Overwatch,COD) 有明顯分別,對於玩第一身遊戲會頭暈既玩家可以講得上係入手佳品。不過要注意一點,GOW 系列跑步時候畫面會 Fing 得幾勁下,需要時間習慣。

咁 GOW 最吸引人既地方相信就在於後面 2點。每代對戰一開波你就會見到隊友先開一發空槍黎上彈 (呢個動作俗稱上金彈,Reload 時係準確時間上彈,下一發將會增加攻擊力),因為 GOW 系列對戰主要武器並唔係極具標誌性既鋸槍,而係 Shotgun,近距離對戰先係 GOW 系列最正統同時亦都係最刺激既打法。咁當然都要搶特殊武裝 (機械弓 / 炸彈 /榴彈砲等等),但係 Shotgun 對戰絕對係必修課黎。

2016-11-21_165737

歷代都有既上「金彈」

 

GOW 系列當接近掩體一定距離就可以「跣」埋去挨落掩體度,而「跣」呢個動作係比起跑步速度更高,而且「跣」係可以中途取消同埋臨近牆邊係可以開槍既!聰明既讀者睇到呢到應該已經 Feel 到少少野。無錯,當你純熟利用「跣」黎快速移動 & Cancel 攻擊,又或者快速切換掩體黎轉換位置你將會享受到其他槍 Game 比唔到你既感受!


你睇下幾有型,練得熟咩女都比你溝晒啦

 

總結:

今集其實可以講係以往幾集既強化版黎,補強以往既不足,豐富原本會打到悶既內容 (持久戰),加入跨平台 CO-op,堪稱已經係無死角既作品黎,除非你好憎射擊遊戲啦。以往我部 Xbox 360 係有2年左右時間無換過碟,當時仲要主力係玩隊保,可見遊戲既魔力。比較遺憾既一點係 GOW 系列比其他射擊遊戲更需要隊友,不論持久戰定係對戰。持久戰可以因為一條友唔識玩洗晒大家啲錢而輸,對戰好似我上面所講,對手勁既話絕對有能力一個人清你全隊 (我當年都閒閒地一打三無難度啦),無人示警補位就真係屎都有得食。不過總括而言,作為 Xbox One 機主入返一隻 Gear Of War 4 必定唔會後悔!

 

d65ed71c-21ab-48f0-bcb4-4507fc9fa755

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章