今次既《G Generation Genesis》係首次有香港譯名，咁睇得起香港玩家基本上已經要支持架啦。之但係隻 Game 出咗頭一日中文版已經差唔多斷晒貨，咁好賣真係要講句恭喜！不過呢好多人係買唔到而等緊下水大貨返既，咁就不如睇下包膠文+小小心得啦！

基本上我係用燃燒生命 Mode 黎玩既，去到而家都叫做玩透咗隻 Game，呢度極推薦大家入晒 PS4同 PSV 版，因為有 Cross Save 既關係可以全力燃燒生命 (同銀包)！而今集因為系統上面作出咗唔少改動，當然有好有唔好啦，以下會為大家一一講解。

今集主題「傳承靈魂、回歸全新原點」，對呢句說話我既理解係在於故事劇情表達上面。大部份劇情都做得非常足，就算你無睇過果套作品透過劇情你都大約知道講乜。戰鬥同 CG 雖然感覺有小小 Hea，但都係水準以上的。另外對香港玩家最大賣點「香港譯名」都叫做得幾全面，「無腳」、「80%」呢啲經典對白都會見到，雖然偶有譯漏不過我已經收晒貨啦。不過關於「回歸全新原點」開頭我仲以為會返到去以前 G Gen 1咁，由核戰機慢慢升到上吉姆再出試用型高達咁…..睇黎係我諗多咗。

連呢 Part 有得玩，故事表達算係做到足

今集既 Break 做得都幾 Hea……連對白都無

系統就變咗唔少，不過萬變不離其宗，G Gen 系統最大賣點就係可以將你任何機體或任何機師都練到一騎當千，今集亦都唔例外 (不過有樣幾失望，下述)，所以寫埋晒果啲咩 55部必開發機體真係外行到不得之了，淨係用得果幾部你去玩 Gundam 無雙啦，玩乜春 G Gen 嗟！

玩 G Gen 梗係要升自己愛機！

有愛直頭唔升後繼機

上面講到失望既，就係今集竟然無保留到繼承系統。簡單講就係當機體改造去到一定的次數後，開發或交換下一代機將會有改造BOUNS繼承。例如當機體改造 35次之後開發或交換，本身升LV有 Bouns 繼承的會由 +1變成 +4。呢個系統係幫助你快速咁將廢機升到變神機，不過好遺憾已經實測今代係無呢個系統，當然你都可以繼續升你既愛機到無雙 Mode 既，不過就慢好多咁解囉。另外機師方面亦都取消咗每10 LV +1 Chance Step，今代要加 Chance Step 數只有升爆 NewType 技能 LV 一途，不過都係加一次咁大把，無得再一 Round 清場啦。

已實測係無 Bouns System

無咗每 10LV 加1次 Chance Step

今集新增「技能」，類似機戰既精神，不過每關每個技能只限用1次

今集好既地方有唔少，易上手，早期已經可以得到極強機體，任務系統同Get 系統可以令你快速拎到更多機師同機體，對於初接觸 G Gen 或者並唔擅長戰略遊戲既朋友係幾貼心設定。而 SFS 既出現亦都令到本身愛機出現係原本無法出擊既地型上 (我隻 Blue Destiny 1 可以出太空丫)，砌隊自由度都可以算係歷代之冠。

有SFS 基本上可以任砌 (不過大機唔適用)

係太空用 BD-1 EXAM (好滾動)

任務系統令到遊戲變得更容易攻略

達成條件好早期就可以得到古惑菠籮

交換系統可以快速咁換下一級既其他系列機體

固有設計系統無乜大變化

總括黎講今次 G Gen 耐玩性係一流，Normal 難度算係比大家熟習遊戲系統，Extra 難度如果無乜練過機體 / 機師入去打基本上極易滅團，要練晒成隊愛機夠打 Extra 都需要唔少時間。最後比小小貼士新入坑既朋友啦，如果想速攻就咪鬼信果啲咩鳳凰高達(能力解放型)做主力既建議，因為到Normal 中盤已經唔夠力架啦 (有愛另計)。要速攻既應該一開始就揀 Unicorn，第2關已經可以 Get 到獨角獸，儲夠12萬買機之後齋練獨角獸已經可以無雙，不過難易度就會大減 (Normal 計)。如果想慢慢享受就由 0079 開始打起啦，真正慢慢感受時代既變化嘛！