2016年就快過啦，咁年度回顧呢啲野就梗係唔少得架啦，我地 VJGamer 編輯部就嚴選咗十大最差遊戲，當然有部份差並唔係隻遊戲本身差而係有其他因素影響咗，唔知大家今年中既伏有無呢十隻份呢 LOL
2016 年度十大最差遊戲 (排名好難分先後阿老友)
《No Man Sky》
出之前係威係勢，個 Concept 又幾創新，連我地都報導咗幾次咁。點知出咗之後先知道官方吹水，其實係無 Co-op，名符其實 No Man Sky。雖然之後出咗大更新企圖補鑊，亦都引到唔少人返去玩，但係開壞咗個頭已經去唔返之前個勢啦。
《Mighty No.9》
成日驚醒人果個洛克人老豆 – 稻船敬二係 Kickstarter 眾籌既作品，本身話 15年推出但係拖到 16年先出到，由有 Demo 試玩果陣已經對佢零個期望，正式推出之後亦都不負眾望，以垃圾既姿態震撼上市，難為我地艾力做直播打晒隻 Game阿真係……
《Street Fighter V》
老實講，以一隻格鬥 Game 黎講 SFV 絕對係水準之上，但係冠以《Street Fighter》名字既話就真係唔合格。對比《Street Fighter 4》既強勢，SFV 推出時不但無辦法留住 SF4 既 Fans，連最基本既街機模式都欠奉，Server 頻頻出事，直接影響銷售數字以及比賽參賽同觀看人數。系統雖然存在大量不足，但係見到官方係有心改善，上星期推出既更新可以見到 Lag 機問題大大改善。雖然係咁，但係面對住 Capcom 內容政治角力、積落黎差既口碑以及面對住 KOF 咸魚翻生，SFV 要係跟住落黎既日子爭返口氣並唔係咁易。總括黎講，SFV 得到最差遊戲一席好大部份原因並非遊戲質素出現問題，而係其他因素影響，呢點同《Divison》非常相似。
《Pokemon GO》
一出果陣風靡全球，周街都見到一堆人捉呢樣捉果樣，精靈訓練員差唔多佔領晒全港公園添，不過隻 Game 內容不足，似集郵 App 多過似 Game，最後淪為老友memes 之間既遊戲。其實遊戲 Concept 係唔錯的，亦都令到唔少人投入 Pokemon 既世界，可惜官方營運不善導致白白浪費咗隻遊戲。
《Quantum Break》
冇辦法，宣傳嘅時候大家以為一隻科幻少少嘅《Max Payne》，射擊味重之餘仲有超能力要素仲唔正！咁結果落差大之餘，玩家仲要玩完一章比兩個選擇你去選擇之後嘅流程，再就睇條20-30分鐘嘅〔真人電影〕，成個世界抽離晒之餘兩條分支其實同玩家玩嘅進程分別唔大！衰啲講好好地拍套戲可能仲好過搞隻Game。
《BattleBorn》
唔計隻 Game 撞正《OverWatch》推出日期，淨係計內容都問題多多。遊戲打擊感極虛，好有打空氣既感覺呢個最為敗筆。另外人設亦都出晒事，差不多全角色都極其樣衰，我都好想知道個 Designer 用咗咩手段令公司接受呢堆角色。而音樂直頭接近零…….其實仲有好多問題，不過算啦…..你問我呢隻同《Evolve》邊隻差啲我真係答唔到。
《One Piece: Burning Blood》
其實如果做返無雙可能無問題，之不過改做 3 vs 3 對戰就出晒事……如果你好似 《Jump 大亂鬥》又或者《Gundam VS.》咁玩應該幾正，但係佢好似用咗《無雙》系統去整隻格鬥 Game咁，結果就變咗隻接近鬥撳制 Game。不過最大既問題係作為一隻 Fans 向遊戲，你個故事模式短到得果幾關……我真係玩返無雙好過。
《Resident Evil: Umbrella Corps》
掛住生化危機牌頭出既 3 vs 3 PVP 對戰槍 Game，遊戲有唔少創新設計，例如單手托住度門開槍，又或者特登比喪屍咬，拎條屍黎做盾牌咁。而當中最核心既設定就係每個角色身上都會有個「喪屍干擾器」，只要打爆咗呢舊野，咁啲喪屍就會追住佢黎咬啦。就咁睇好似幾有趣，咁問題出係邊度呢？答案就係佢地 Target 用家群係打《Rainbow 6》呢堆 Core Gamer，你搞咁多野先殺條友….我不如一槍爆頭啦，完全弱智設定黎。如果呢隻 Game 擺係 Bio 6，用 DLC 模式黎賣我諗反而會有啲聲氣，而家咁賣…….抵你拎最差十位。
《Call of Duty: Infinite Warfare》
COD 最新一集，主打未來戰爭。不論射擊感，速度感都極欠奉，同類型既《Titan Fall 2》真係贏你幾廿個馬鼻……。不過隻 Game 既豪華版係幾好賣，梗係啦……豪華版有隻超正既《Call of Duty: Modern Warfare Remastered》嘛！
《Until Dawn: Rush of Blood》
PSVR 恐怖射擊 Game。遊戲內容係坐係架果山車度前進，沿路射擊周圍出現既怪物咁。我地玩果陣大家都體驗到樣好神奇既野，就係過山車衝向下果陣我地係感受到離心力 (我地企係度玩)，好得意！！咁點解會被列為十大差 Game呢，無他既，作為恐怖 Game，連我地最怕玩恐怖 Game 二人組 (艾力+砲) 都玩到恰眼瞓既話……
VJGamer總編，細細個已經蒲機舖，機齡甚深，熱愛電玩文化。