《Kong: Skull Island》電影延續 ! 同哥斯拉打邊個贏 !?


星爺話齋 : 「大片有彩蛋 !」我諗睇過《Kong: Skull Island》嘅朋友一定有坐定定睇埋片尾嘅彩蛋,(如果未睇戲可以出番去先) 彩蛋內容大概講男女主角脫險後,竟然比同行嘅 “MONARCH” (中文譯「君主」)嘅成員捉咗帶番總部問話,更透露呢個世界唔只得 King Kong 呢隻大怪獸,係世界各地仲有其他大怪獸,當中仲見到熟悉嘅影子 – 哥斯拉 ! 換句說話講,《Kong: Skull Island》同 2014 年上映嘅《Godzilla》係同一個世界觀,除咗哥斯拉,彩蛋片段所見到嘅壁畫仲見到其他東寶著名怪獸 – 三頭金龍 King Ghidrah以及摩斯拉Mothra,而呢個世界觀就稱為「MonsterVerse」。

《Kong: Skull Island》片尾彩蛋

King Ghidrah

Mothra

《Kong: Skull Island》世界觀連接
係以前嘅 King Kong 電影,Skull Island 都有出現恐龍,甚至係 2005 年  Peter Jackson 執導嘅 King Kong》都有上演一埸 King Kong 大戰暴龍,但點解今次《Kong: Skull Island》冇呢 ? 呢個設計都係同哥斯拉有關,因為呢個世界觀已經有類近恐龍種類嘅哥斯拉,導演唔想有重覆嘅電影設定,加上唔想出現類似Jurassic Park》人類對抗恐龍逃命嘅場囗,所以改用 Skullcrawlers (爬骨獸) 代替。導演亦刻意係電影名字上花心思,電影名上只有 “Kong” ,並無”King”,表示今次 Kong 只係初部型態,之後仲會長大落去,成為真真正正嘅 King Kong ! 另外 “MONARCH”呢個組織亦貫穿整個「MonsterVerse」世界觀。

2005 年  Peter Jackson 執導嘅 King Kong》

King Kong 大戰哥斯拉
其實將咁多隻怪獸聚首一堂嘅計劃並唔係近排嘅事,電影公司 Legendary 同 Warner Bros. 一早計劃將《Godzilla》及《King Kong》嘅電影系列合拼,以三部曲形式推出,首部曲就係剛上映嘅《Kong: Skull Island》,之後就係 2019 年嘅 《Godzilla》續集 ( 應該係大戰三頭金龍 King Ghidrah ),而 2020年就係終極一章 – King Kong 大戰哥斯拉  ! 其實呢兩隻怪獸都唔係第一次對決,早係 1962年就係日本上映《金剛決戰哥斯拉》(キングコング対ゴジラ)呢齣電影非常有紀念價值,分別係東寶 30周年紀念作品丶第一部哥斯拉彩色電影作品以及第一部 King Kong 彩色電影作品,亦係美日雙方代表性怪獸首次碰頭,而票房亦係哥斯拉系列中最高。

《金剛決戰哥斯拉》(日版poster (左) 美版poster(右) )


《金剛決戰哥斯拉》中出現 King Kong 大戰海怪八爪魚,而《Kong: Skull Island》嘅 Mire Squid 正正向呢幕致敬 !

1962年《金剛決戰哥斯拉》trailer

《金剛決戰哥斯拉》當時亦出現城市傳聞,話說美版嘅 ending 會係 King Kong 打贏,日版嘅 ending 會係哥斯拉打赢,真相係點 ?

Ending 片段


其實美版同日版只有少許唔同,但結局只有一個,可以話係 King Kong 赢,片尾見到兩隻怪獸打到跌落海,最後只見到 King Kong 上番水面遊水離開,但亦冇交代哥斯拉有冇死到,唔知 2020年新版嘅決戰會係點大家真係要拭目以待。

艾力

幪面超人頭號粉絲,玩具figure 無一不歡,極喜歡玩潛入式遊戲。怎吃也不胖,只因最喜歡「食字」﹗人生座右銘是「自作樂,很快樂」。

追蹤

更多文章