《Iron Fist》今日有得睇 ! 懶人包解構英雄之謎 !


Netflix 自家製造,繼先前《DareDevil》(夜魔俠)丶《Jessica Jones》(西卡瓊斯)以及《Luke Cage》(盧克凱奇) 第四部 Marvel 劇集作品 《Iron Fist》(鐵拳俠) 今日 17/3 正式係 Neflix 有得睇。《Iron Fist》亦會聯同先前三位英雄結集成為 The Defenders,而且會有劇集作品,美漫 fans 一定要追埋呢套啦 !

The Defenders

誕生由來
七十年代美國因為李小龍而非常流行中國功夫,Marvel 亦受呢種功夫熱潮影響從而創造出一個功夫英雄 -「Shang-Chi」(上氣)  ,推出後大受歡迎,創作人 Roy Thomas 及 Gil Kane 繼續食住條水創作全新嘅功夫英雄 -「Iron Fist」,係 1974年5月嘅「Marvel Premiere」#15 正式登場 !

「Shang-Chi」(上氣)

「Marvel Premiere」#15 Iron Fist 首次登場

又係死雙親嘅身世
「Iron Fist」原名 Daniel “Danny” Rand ,出生於 New York City 嘅富裕家族,爸爸 Wendell Rand 細個嘅時候發現一個叫「 K’un-L’un 」(崑崙) 嘅神秘城鎮,雖然因為救咗呢個城鎮嘅話事人而被收養為養子,但最後都決定返 New York 創業,之後就娶咗 Heather Duncan 生咗 Daniel。

「 K’un-L’un 」(崑崙) 嘅神秘城鎮

到咗 Daniel 9歲果陣,爸爸Wendell 想番去「 K’un-L’un 」探親,於是就帶埋 Daniel 同老婆,加埋生意拍檔 Harold Meachum 一行五人出發,好景不常,Daniel 爬山果陣唔小心跣親就黎跌落山,仲要唔好彩同父母綁住同一條繩,係危急關頭生意拍檔 Harold 出手相助,但原來佢自己暗地裏鍾意 Daniel 嘅媽咪 Heather,於是剩係救起 Daniel 同 Heather,白白害死 Wendell。
Daniel 兩母子對 Harold 嘅做法非常憤怒,於是唔理 Harold 直接返番營地,但真係衰開有條路,兩母子不幸被狼群包圍,Heather 救仔心切捨身救 Daniel ,最後命喪狼群口中,之後 「 K’un-L’un 」嘅人拯救咗喪失雙親嘅 Daniel ,仲教佢武術,慢慢成為武術家。

打造「鐵拳」
Daniel 係佢師父 Lei Kung (雷公)教導下慢慢成長,19 歳嘅時候,為咗成為 Iron Fist 而去挑戰巨龍 Shou-Lao (壽老),因為只有呢個方法先可以獲得 Iron Fist 嘅鐵拳能力,Daniel 心口嘅龍形紋身係戰鬥期間被     Shou-Lao 所燒成,最後 Daniel 成功撃敗巨龍,行入龍穴,將自己雙手放入盛放住龍心嘅火盆中,籍此打造威力無比嘅「鐵拳」,而且吸收龍心嘅力量令自己變得更強,正式成為 Iron Fist !

Iron Fist 師父 Lei Kung (雷公)

挑戰巨龍 Shou-Lao (壽老)

全能嘅武術家
Shou-Lao 嘅龍心賜予 Iron Fist 驚人嘅力量同體力,仲有靈活嘅身手以及異常敏銳嘅眼力,而且本身精通柔道、合氣道、忍術、空手道及拳擊等武術。Iron Fist 仲可以運用自己體內嘅氣瞬間增強體力,而且可以減輕自己承受嘅痛楚,仲可以幫自己或其他人療傷。 Iron Fist 可以好似 X 博士咁心靈感應,知道對方嘅思維同記憶,而佢嘅絕招就係將全身嘅氣集中係自己嘅拳頭,從而駛出終極一撃,威力非常巨大,但呢招會消耗大量體力,要一段時間恢復先可以再次駛出。

Netflix 出品嘅劇集作品 《Iron Fist》雖然係外國嘅傳媒預覽(搶先睇頭6集)得到出黎嘅評價好壞參半,仲有評論指係最差嘅 Marvel 劇集作品,但我抱住觀望態度,自己都幾鍾意呢類硬橋硬馬嘅英雄,加上之後會推出 The Defenders 劇集作品,點都要睇下,唔講咁多住,煲劇先~

艾力

幪面超人頭號粉絲,玩具figure 無一不歡,極喜歡玩潛入式遊戲。怎吃也不胖,只因最喜歡「食字」﹗人生座右銘是「自作樂,很快樂」。

追蹤

更多文章