買左返嚟其實都好一段時間,本來真係諗住自high下冇諗過介紹,加上在下手藝比較差又無謂獻醜啦!但睇完套《Power Rangers》之後又有啲到喉唔到肺嘅感覺,所開完砌完發現唔對路,真係要介紹下比大家!
SUPER MINIPLA 系列去到大獸神呢隻其實都已經係第 4 隻,呢個系列出晒名啲變型同合體跟足之餘,活動性仲非常高。不過啲膠質就真係食玩質素,啲水口位仲要喺啲當眼位,純素組朋友真係要多少少心機。
包定底,我就素組貼貼紙啫,其他乜都冇搞,手功差唔好見怪啦!
守護獸霸王龍
守護獸猛瑪象
守護獸翼手龍
守護獸三角龍
守護獸劍齒虎
五隻守護獸獨立睇係冇乜可觀性又冇乜大可玩性,所以快快趣入正題「合體・恐龍使命」
獸戰車 恐龍坦克
獸戰車都只係一個過程,最終我地當然係想「發動・大獸神」!
大獸神登場!
其實呢套大獸神之前都話過活動性非常高,但淨睇上圖大家會發覺對腳連貼地都做唔到,話活動性高真係講唔通喎!
冇錯,其實大獸神嘅合體玩具多數都有腳唔到地嘅問題,所以呢套就話你知係有解決方法嘅!只要喺三角龍同劍齒虎身上做多少少設計上嘅改動,加多一個活動式連接位,就可以令呢個多年問題解決得乾乾淨淨。
總結
整隻《SUPER MINIPLA 進化合體 大獸神》要讚嘅地方仲有好多,例如部件嘅分色、部份件係已經上色、合體之後多餘組件嘅收納等等,都係超越一般食玩嘅層次。咁有讚亦有要彈嘅地方,之前講過嘅膠質同水口問題,但當你計返佢CP值,一套收你三舊幾(有師兄仲話見過現貨賣兩舊幾添),有得砌有得變型有得合體,你仲想點?