極度觸目既 Nintendo Switch 大作《Arms》係今朝 Nintendo Direct 入面發布咗新片，為大家帶黎咗極多既遊戲相當既資訊，而且最重要一點係：原來隻 Game 有 2 vs 2團戰模式！！

影片介紹咗初始玩家可以裝備既拳套類型，分別係：Glove Type、Multi-Shot Type、Curve Type、Heavy Type、Whip Type 五種，另外每種拳套再可以選擇 7種屬性其中一種，對應唔同屬性拳套將會顯示唔同既外觀以及對應返所選屬性既能力。

五種初始拳套類型

對應唔同屬性既拳套外觀

火屬拳套有 Down 屬性

電就附加麻痺，中咗狀態之後可以連招

風屬就係轟飛

冰屬都係定人，暫時未知同電屬既分別

仲有爆炸，暈同盲未公布相關資料

新片亦都介紹咗收集元素，透過挑戰練習關卡賺錢買箱就可以得到新拳套，就咁睇已經種類極多，睇個勢係有排玩。

淨係要玩熟每種拳套都要一段時間

之前條片大家都見過既5個角色之外，另外再公布咗一個新角色「MINMIN」。而每個角色都有自己專屬既能力，例如 Spring Man 可以彈開攻擊，瀕死會有 Perma-Charged，Ribbon Girl 就係跳躍特化型等等。由於所有角色雙手都可以裝備任何拳套既關係，唔同角色+雙手唔同拳套+唔同屬性就會變出極多組合，基本上都好難撞到一模一樣既角色。

每個角色都有自己既專屬技能

出戰前可以選擇拳套，可以鴛鴦手無問題

拳套無裝備限制，女角都用得 Heavy Type

新角「MINMIN」可以用踢開敵方攻擊

「MINMIN」左手係龍型 Arm，儲滿氣會變型

儲氣攻擊有2段判定，打擊之後會再噴 Laser

遊戲同時提供 2 vs 2模式，嗯……我見到佢想打電競市場既野心啦。遊戲會於 2017年 6月 16日正式發售，大家準備到時噢啦噢啦噢啦噢啦噢啦噢啦噢啦噢啦扮白金之星啦！

同時老任亦都順便話埋比大家聽會為《Arms》推出 2樣野，第一樣就係《Arms》黃色 Joy-Con同個 Strap。另一樣就係驚死你帶出街唔夠電用既 Joy-Con AA 電 Pack，2樣野都未有訂價，同樣會係 6月16日上市。