【遊戲包膠】《Horizon: Zero Dawn》- 百抄成材,借來的遊戲

 嗱事先聲明,係遊戲製作來講,抄或者似某D GAME 並唔係壞事來,費事又有一大班鍾意呢隻game 既人係度話我抨擊隻game。

一樣文長,涉及劇透,結尾有總結。

正所謂所有創作都離唔開技巧同方法,大如電影拍攝,早就已經有哂各種鏡頭燈光技巧,只係睇某套戲個導演點用,用得好定用得差而已。小至寫篇文,文字既形象同使用方法如果唔跟,就根本冇人會睇得明(除非你係鄺神),所以話呢個世界邊有百分百原創架。百抄可以成材,只要識得抄,整得好,借橋整GAME 又有咩所謂呢,係咪?

而係近呢十年,電子遊戲業界對於一隻成功既動作冒險遊戲有一種全新既定義。由Ubisoft、Bethesda 同Rockstar整出來既經典遊戲,留比後來者既唔單止係一個設計意念,而係一條成功方程式。而Horizon: Zero Dawn,就係我所見過,同一隻Game 入面抄得最多條方程式既。

我諗緊,佢地整呢隻game 既時候開會係咪咁︰

腦︰腦細
昇︰阿昇
明︰阿明
瑩︰阿瑩

腦︰嗱我地終於定左個方向係整呢隻叫Horizon: Zero Dawn 既新動作冒險遊戲,係呢個遊戲系統上,大家有咩意見?

昇︰首先呢隻Game 一定要係開放世界先啦!而家D Game 唔係開放世界點可以叫大作架!

明︰跟住我地學似Skyrim 咁,一張地圖就有齊雪山、沙漠同草原

瑩︰然後再學Skyrim 咁,整個指南針,帶大家去打主線,然後係行緊果陣就彈D 支線圖示出來等大家不停咁接支線,去做支線果陣又接到好多支線,咁就永遠都玩唔完啦HAHAHAHA

腦︰好邪惡下,咁有冇D 開地圖系統呀

明︰好似刺客信條咁爬上個塔度咪得囉!佢地由刺客整到Watch Dogs,Far Cry,Division都係咁整架啦,跟住條公式做實冇錯!

昇︰但係Watch Dogs 已經進化到要做任務HACK 果幢野架喇喎!

瑩︰挑咁幾唔簡單,溝埋一齊做完任務再爬咪得囉!

腦︰咁個世界觀呢?

昇︰而家Tomb Raider 興呀!梗係搵失落文明啦!

明︰下?我以為我地隻Game 係講科幻架喎!唔係末日絕世未來世界咩?好似Fallout 咁架嘛,都冇文明點搵失落文明呀?

瑩︰咩呀,頭先先講緊又雪山又沙漠,乜唔係去荒野探險咩?Far Cry 咁文明人遇到部落民族咁丫嘛

腦︰唉唔洗嘈,直接炒埋一碟啦!嗱個主角一邊以文明人遇到部落民族咁既方式係荒野果度一邊冒險一邊搵失落文明啦!呀編劇識寫架喇!

腦︰咁個戰鬥系統諗住點整?

昇︰喂而家Tomb Raider 興返呀!梗係跟人地用女主角揸弓箭啦!

腦︰Jennifer Lawrence? 好咁跟住呢?

昇︰嗱一於順手抄埋人地果個採集同整箭系統,要D 人一路行一路收集野,咁就實有排玩

瑩︰講起整箭,咁就加埋芒亨個部位破壞落去啦!要射某一PART 出來整箭幾有挑戰性呀

明︰雖然係科幻Game,但係加埋芒亨個屬性傷害落去好似個畫面又會多好多特效同靚好多喎

腦︰都OK,但係大家有冇辦法加D 潛行,你知架啦!而家冇潛行系統,冇D 野比人諗下,好難令D 玩家以為自己真係有腦架嘛!

明︰下?而家打機械獸喎腦細,唔係打人喎,點潛呀!

瑩︰超!容乜易,照搬刺客信條果個草叢隱身術咪得囉!凡係打交果D 地方就整幾個草叢,主角只要一行入去就乜人都見你唔到喇,搞掂!

腦︰跟住要就返D 玩家唔識瞄準……自動瞄?

昇︰唔好,嗱GTA 都有Michael 可以減慢時間啦!Watch Dogs 條友都識Focus 減慢時間,咁咪可以慢慢瞄囉!又可以容易D 又可以令D 玩家以為自己真係準丫嘛

腦︰嗯….咁騎馬果方面…..

明︰哦,照搬返Red Dead Redemption 同The Witcher 3 果D 物理動畫效果啫!明架喇明架喇!

瑩︰腦細,Far Cry 3 果種搶村既方式我覺得幾好

昇︰你係話最好潛行然後整熄個警報然後慢慢逐個殺哂D 人果種?

瑩︰係呀,唔識潛果D 衝入去又得,潛行冇比人發現做哂所有野又令人有成功感喎!搶到條村仲可以做傳送點添!一舉三得!

腦︰大家既提議都OK。嗱咁最後加少少潛行Game 必有既潛行處決,再學Bioware 咁,周圍放D 文章係度比大家了解返個Lore,呢D 識架啦!解散!

我上面究竟講左幾多隻Game?H:ZD 有抄既肯定唔只咁少,有更加多我係講漏左。如果我搵到演員既話我應該用上面果堆野來做劇本拍返個片,等大家明白點解呢隻Game 叫百抄成材。

但係呢隻Game 除左抄得野多之外,仲有好多值得探討既地方。

 

點解要用女主角?

嗱我知道我一咁講好多女人又會跳出來話咩叫點解用女主角?點解淨係得Nathan Drake 果陣冇人問點解要用男主角?呢個問題本身就性別歧視!
冷靜D 先……而家係問緊,點解淨係得女主角,而唔係有得揀啫………

近年來世界各地都興起性別平權運動,搞到唔只電影(Star Wars VII),連電子遊戲界都意識到,同以前一樣純粹用一個男主角擔大旗係唔可能。

就好似一直行係性別平權第一線既Bioware,由90年代開始已經係Game 入面有得揀男女主角不特止仲可以Les/Gay/Bi/Trans 都玩齊,真係LGBT 既先鋒。直至去到Mass Effect 1,稍一不慎淨係用左男主角做封面真係好大件事,終於去到第三集時候唔單止要為女主角出多一個封面,連Trailer 都要重新整一條,直至而家Mass Effect: Andromeda 仍然係有兩條Launch Trailer。

跟住你見到Bioshock 去到第三集都加個超能女主角(雖然唔關性別平權事),Naughty Dog 都明白到淨係得Nathan Drake 一個實死冇生,於是整The Last of Us 既時候就雙主角(好似都係唔關事),而家Uncharted: Lost Legacy 仲要女人擔大旗添!連男人味去到最盡既God Of War,Kratos 都要湊仔,講返男人都有溫柔既一面同埋係家庭中除左賺錢之外都有養育子女既角色…..嘩,呢個風潮簡直係席捲!

如果你覺得Bioshock 既Elizabeth 已經可以隨意穿越時間同空間,成為全部世界既人最重要既一個點(佢真係一個點),都未夠女性中心既話。咁你可以睇下Horizon: Zero Dawn 既Elisabet Sobeck,一個天才科學家,點樣單手拯救全球生命於危難之中,然後再重生,用另一隻手再拯救多一次。佢係名符其實既世界之母,故事入面如果冇佢地球一早玩完,夠傳奇未?夠女性中心未?

註︰Elizabeth 除左因為係引領英格蘭走向全盛時期既女王之外,文學上,珍‧奧斯汀既「傲慢與偏見」中,女主角Elizabeth 亦確立左女性對愛情自主自由既地位,為後世推崇。唔知邊個對於遊戲中既Elisabet Sobeck 影響大D,但係Elisabet Sobeck 係故事中亦同Queen Elizabeth I 一樣一生未婚,並無後裔。

點解某個界別要多用女角色做重要位置?當你既主要客戶女性既比例越佔越多果陣你咪有需要囉!

睇返ESA 每年都出既遊戲業界Essential Facts 來話比大家聽邊個買Game 同邊度玩Game。其中男性同女性Gamer 既比例已經係去到幾乎五五開。即係而家既遊戲好大機會唔單止係女人玩,仲係女人出錢買!直至今年年頭PS4 全球銷量已經去到五千三百萬部,傳統上男性遊戲玩家市場極有可能已經飽和,但係股東係冇可能放任你個銷量放緩!嗱頭先講到女人好似好多買機打機咁,但係個數字包括哂所有女人,同埋所有類型既遊戲,即係阿嬸們不停玩Candy Crush 課金都計……所以35歲以下,玩返正常Core Game 既女性仍然未佔大多數。係呢一個咁大既市場紅海下,Game 廠偏向女性市場開發遊戲又真係無可厚非既,反正男人都唔會介意係女主角架啦!可以令更多女人認同你既遊戲,冇咩唔好。

(圖片來源︰http://essentialfacts.theesa.com/Essential-Facts-2016.pdf, Page 2-3)

(圖片來源︰http://essentialfacts.theesa.com/Essential-Facts-2016.pdf, Page 4-5)

咁講左咁耐女主角之後,係時候講下隻game 既優缺點來做評論喇。首先係優點。

蔗渣咁既價錢,燒鵝咁既味道

就如同當年PS3 既The Last of Us 一樣,Horizon: Zero Dawn 個畫面係PS4 上並不能夠用好,極好或者十分好來形容。佢個畫面既質素我會叫做︰黑魔法!你一開game 果一刻甚至會對世界同蒼天作出疑問︰「如果千幾蚊既PS4 都有咁既畫質,點解我要用三千幾蚊去淨係買張Display 卡砌電腦呢?」你會開始喊,係攬住你果張三千幾蚊既GTX 1070 喊,因為你買左佢而冇買PS4 既話,就唔會玩到呢隻Game,而呢隻Game,GTX 1080 都Chur 唔到咁靚!

撇除女主角之外對於男性玩家來講,呢個可能就係買呢一隻game 既最大原因,因為佢真係靚到咁。你唔需要理會佢用左咩魔法,令到佢咁既畫面仍然可以係蔗渣咁既PS4 上面有1080P 同30FPS,定係只係用左美術風格來掩飾佢畫面上既甩漏,但係就算佢真係咁做冇所謂,因為佢掩飾得好靚!

當然同The Last of Us 一樣,佢都係度提醒緊你,PS4 最美好既遊戲已經推出,已經係PS4 Pro 既時代喇!(換機啦換機啦!)

遊戲史上最痴鬼線既劇情

係風光如畫既畫面背後,好多人都遺忘左呢隻Game 本身個故事,或者就算睇完,都唔明呢個故事係有幾咁痴鬼線。

佢唔係Star Wars: Knight of The Old Republic,或者Bioshock 1,佢唔係Mind-fuck 或者玩Plot-Twist 既故事,佢個敍事好平鋪,但係伏線埋得好深,跟住一超展開就會令所有人即刻黑人問號上身…..

“佢唔會令你好詫異,因為佢令到你自己都唔知自己詫異緊!”

因為唔想劇透太多,所以再形容落去都係好空泛,但係就算你唔打算玩,都請你搵個玩左既朋友講返個故事比你聽。然後你地兩個再仔細諗下,有冇係其他科幻作品入面見過主角咁樣去拯救世界法?我真係諗唔到。你可以話佢個世界觀同前設事件係好特登咁令到主角得返呢條痴鬼線既路可以行,但係比著你係主角,你又諗唔諗到一條咁既路?

跟住到冇咁強既優點

所以呢,你只要狂撳射箭就得架喇

呢隻Game 自己都講到明有參考芒亨既打怪方法,但係比起芒亨越加越多既武器同技能,相對上Horizon: Zero Dawn 乜野都冇,只係不停咁射箭就得。

本來隻Game 加左部位破壞系統,係可以令到玩家打怪既時候有更多其他野要注意,因為都好少遊戲打Boss 只要整爛佢支槍佢就用開唔到槍。多數遊戲都會用Boss 階段來整呢D 野,即係斬到一半,就會出個動畫,跟住主角就整難左個Boss 既某樣武器,然後Boss 就會進入第二階段,用另一D 攻擊方式來打你咁樣。H:ZD 就將佢整成每個部份都有自己既HP,例如BOSS 正路都係開槍,如果你射爛佢支槍,佢就逼住要用近戰打你,成個打法都唔同左,但同一時間你又可以執返佢支槍射返佢。當然你亦都可以純粹用掩護打法,避開炮火,然後拉遠咁打,因為BOSS 有槍就會減少有近戰。變相你可以卡住Boss 永遠係第一階然後用你最勁既遠距打法來屈佢弱點。咁樣一來一回幾種打法思考,令到隻Game 個戰術層面深厚左好多………..至少開始果陣係。

前期既時候大家可能都仲會為左打大怪而整定陷阱或者諗下要唔要帶定身繩之類可以易打D。

去到後期大家都買哂最勁既普獵人弓或者元素弓,基本上學哂一次射三支箭同子彈時間都加速拉弓…….跟住大家要做既就只係狂撳。因為主角一見到果種怪就知佢弱點係咩屬性,玩家可以直接用元素箭一次射三支仲要係狂撳,屈到佢身都未起到就死…………..

好啦可能、有機會、或者係同我上面講既關於面向女性市場既野有關,但係你好難想像到芒亨會有Slow motion 技能,而且芒亨本身已經唔係特別難既Game……..

H:ZD 既戰鬥係比較多評論吹奏既地方,但係我覺得就咁狂撳就可以應對到一切情況既戰鬥並唔能話係做得好好。

抄既時候唔可以抄表面,要抄精髓!

前期主角拎到Focus (遊戲中一種個人電腦裝置,進階版Smartphone)既時候,一開已經自動Scan 哂場景入面重要既野。近期有打開機既都知呢個係The Witcher 3 用到濫既特別視覺,當然Witcher 都係抄Batman: Arkham 系列,然而Batman 做既時候呢條橋仍然未濫,去到Witcher 3 既時候已經濫哂。(100個鐘既Witcher 3 入面起碼有30個鐘係呢種特別視覺中搵緊野)

咁條橋濫左又唔係唔可以抄,只不過抄功課既時候又有冇諗過人地咁做既目的係乜野?Batman 既偵探視覺主要當然係比佢用來潛行既時候穿牆睇到敵人,但係解開兇案既時候,佢都會用來Scan 屍體同案發現場,透過Batman 既知識同埋Alfred 既對答,我地對一個幻想既世界既認識會多左好多。

The Witcher 3 用呢個Witcher Sense 就更厲害,主因唔係佢個功能有咩咁特別,而係佢每次需要用呢個視覺都會引伸出一個好委婉既故事。例如幫阿婆搵到煎PAN 都可以發現到間諜陰謀,從而側面描寫返而家係戰爭既亂世。追查樹林入面既狼人,會搵到佢仲係人類時候既足跡同做過既時,發現一段悲劇之後,遊戲開始挑戰玩家既道德觀,要你做兩難既選擇……..

Horizon: Zero Dawn 呢?冇……乜都冇。除左用來做少少潛行攻擊同睇怪物弱點之外,有時搵人都只係幫手搵下我阿妹/阿哥。係,當中要搵既原因涉及佢地係比人排擠,所以流落荒野,都可以算係側面描寫緊佢果個部落既文化,可以作為建立世界觀既一個手段。但係其實唔洗呢D 咁既任務,大家都明架啦下話………..一個咁好既系統竟然只係比人用來做Fetch Quest,真係Batman 都流淚。

呢個系統既精髓從來都唔係比人用左睇個地下有邊個人行過,而係透過要玩家自己去發掘一D 特別地點,可以借機會好好咁描述呢個世界同真實之中一D 相似而又怪異既地方。如果你本身都唔係諗得到果D 咁有趣既橋段,照抄只係抄左表面。

呢隻Game 既角色有Aloy, Rost 同埋…..eh…..

就算你只係啱啱熄左隻Game 你都唔會答到。除左Aloy 同Rost 之外,其他角色根本只係無臉人。冇背景冇故事,最多都係主角同佢地做過少少任務,唔算得係乜野。結果成隻Game 就係世界圍住Aloy 轉,所有人都唔重要。

呢個係Game 既劇本來講可以話係死症。其實而家唔少遊戲都係用主角以外既其他角色來做主要既劇情推動點。就好似Darks Souls 既SunBro 同洋蔥騎士,佢地既故事可謂有血有淚,甚至比遊戲本身主線更有趣。GTA 自第四集開始,每個主線任務都係其中一個重要NPC 派比你,佢地極為重要個程度去到根本佢地先係故事。主角既故事係玩家自己編寫既,尤其係開放世界,根本主角就做乜都得,但當你去到要講一個有結構既敍事既時候,你仍然需要NPC。只有好既、值得記住既NPC 先可以帶動遊戲主線同世界繼續向前。

好似H:ZD 咁主線驚豔但係除左主角之外根本冇個配角係重要既,咁其實個故事發生係邊度、同邊個發生都得啦唉………即係Captain Kirk 唔揸企業號,去開隻舢舨咁佢都發揮到佢作為船長既特長架!都可以有一個好勁既歷險故事添!但係有冇人會睇丫?冇左其他船員,Star Trek 本身就唔會係一個偉大既故事啦係咪?

可以改善既地方

每次寫Game 評我都會寫一段可以改善既地方。就算制作公司睇唔到,都可以比睇到呢篇文既你一齊討論下。

⦁    呢個世界應該要有更多有趣既活動可以做。作為一個開放世界遊戲,呢隻Game 個活動種類真係少到一個點…….不過呢個只係第一隻,睇返第一集既刺客信條同最新果集,其實都睇到活動種類上有驚人既進化。不過如果真係加既話,可以參考返The Witcher 3 既經驗,為每樣微細既活動,加返一D 方向比較大既目標。(例如明明都係清盜賊營地,但係可以幾個營地加埋變做一個村莊救人支線,跟住救果D 人又加D 劇情再加少少起承轉合,咁已經係一個好勁既支線)
⦁    主線來講應該要有更加多令人記得樣既角色。係,主角同主角既前身真係好勁,得架喇知喇,但係其他人,除左個奸角,又有D 咩值得記住既地方呢?
⦁    戰鬥方面真係要加武器,可能唔洗加種類,但係要加武器。又可以抄返Tomb Raider 可能係弓上面要搵素材Upgrade 啦,或者要做某D 任務先至會有特別弓箭技能效果啦,太多野可以做,冇可能一開波開左把紫弓就用一世,完全唔合理…….
⦁    最後…..個部份破壞系統可以做埋落人類度,射走敵人把弓或者刀令佢地打唔到你唔係幾有趣咩?仲有主角都可以係爛左某部份甲會冇防呀,要即刻整返或者換衫,成個戰況應該會再有難度同再有趣好多。

最終評價︰

遊戲基本分︰90 (對於已經有PS4 既人來講係無價之寶)

  • +畫面感動到想喊咁靚
  • +故事夠哂痴線
  • +戰鬥系統還可以
  • 支線好無聊
  • 全世界都係圍住主角轉
  • 一把武器打爆機

最終分數︰93 (如果你有PS4,應該唔會未玩。如果你冇PS4,你終於等到一隻值得買機既GAME 喇!)

 

Peter The Gamer

人生如遊戲,我就係PETER,玩既係人生,唔會有個更好既名。 有時寫下評論,多數介紹下GAME。分享、批判遊戲。

追蹤

Facebook 更多文章