《夢王國與100位沉睡中的王子殿下》

《夢王國與100位沉睡中的王子殿下》(下文簡稱《夢100》)為GCREST所製作嘅模擬類型手機遊戲。遊戲故事講述女主人公放工途中突然去到一個以夢作為力量嘅夢世界，並遇到會吞噬人類嘅夢嘅食夢魔。女主蘊含神秘力量，成為公主，從此負上承救夢世界嘅責任，喚醒沉睡嘅王子，奪回夢世界眾人被吞噬嘅夢。

《夢100》並非新推出遊戲，其中文版其實於2015年已經上架，但近期遊戲大熱，繼而推出嘅活動越嚟越豪華，聲優陣容吸引，不斷加入新角色，並且於今年3月下旬開始推出每月更新嘅短篇動話。除此以外，《夢100》亦即將會有2.5D舞台劇製作， 2018年更會推出TV動畫版。宜家必定係推人入坑嘅好時機。

今次呢篇首先初步介紹下呢個遊戲同官方剛剛更新嘅「星曜之夜」限時活動。

《夢100》遊戲模式

《夢100》遊戲關卡介面同轉珠遊戲相似，但此遊戲並非轉珠遊戲。玩家以王子角色篇成五人隊伍，於戰鬥時須要連接同色碎片，嚟發動唔同屬性王子嘅攻擊與技能。遊戲中，連接碎片須為3個以上，碎片越多攻擊力越大；而每turn嘅連接次數（即Chain）越多，王子們戰鬥威力亦越強。

遊戲故事行進主要分主線故事同限時活動。主線故事喺夢世界地圖上進行，玩家須要遊歷唔同王國，完成任務關卡嚟開啟主線故事同通往其他王國。
而限時活動則為官方推出嘅限定活動。限時活動均會推出通主線故事截然不同嘅劇本，劇本主角亦會更換，有時會推出特殊設計嘅角色版本。玩家須要喺限時活動地圖中通過關卡儲分，儲夠點數就會獲得獎勵，例如金幣、教育員、妖精石同限定角色等。為求獲得限定活動特別人物，爆肝儲分都好有樂趣。

除咗任務每位王子都有單獨故事可以閱讀，只要完家為角色練級同覺醒，就可以開放角色故事，甚至可以打出愛情結局。

而獲取王子殿下們嘅主要方法就係召喚。玩家要通過任務或獎勵獲取妖精石，儲夠一定數量就可以召喚王子。王子稀有度按星星數量增減，5星為最稀有（覺醒王子最高可達6星），外表通常較華麗美型，聲線由人氣聲優配音。

《夢100》遊戲特色

遊戲連接同色碎片遊玩方法簡易有趣，就算以往唔擅長玩轉珠手遊嘅大家都可以輕易上手。除此以外，《夢100》最大賣點一定係美型王子及其聲優陣容。

為《夢100》王子殿下們配音嘅聲優陣容華麗，官方同時採用新進熱門聲優例如八代拓、內田雄馬、梅原裕一郎、大河元氣、鈴木裕斗等，或者老牌神級聲優例如子安武人、三木真一郎、關智一、保志總一朗、石田彰等。如此廣泛陣容貼合市場需要，基本上只要係男聲優控都必定會入坑。我就有一個極推薦大家嘗試嘅玩法－ 就係儲齊喜愛作品嘅聲優所屬角色，然後組成隊伍，幻想其他作品嘅角色穿越咗去《夢100》，成為你嘅王子。（正好《夢100》有齊BL遊戲《Lucky Dog 1》嘅角色聲優，我就儲咗一隊CR:5幹部王子隊）

不過有時唔使幻，其他作品嘅角色都會嚟到夢王國。因為《夢100》不時都會同期他ACG作品合作，例如之前就曾經試過同《偶像夢幻祭》、《黑執事》、《星光少年KING OF PRISM》等作品合作，為作品角色特別設計劇本同服飾，令角色穿越，變成王子殿下。

最新限時活動更新：「星曜之夜」

「星曜之夜」算係近期角色配搭陣容較華麗嘅一次活動。官方亦趁住接近夏日祭典季節，設計以祭典為主題嘅劇本，讓王子角色穿上浴衣，令玩家搶住儲分儲石嚟獲得特別版嘅王子們。

「星曜之夜」活動講述星之國。格拉希亞東國同西國合作舉辦咗星之祭典，邀請女主同不思議之國嘅王子前往參與。女主角同王子都換上浴衣一齊享受祭典歡樂氣氛，同時要解開星之祭典嘅謎題。

今次「星曜之夜」活動嘅主要人物包括：瘋帽子（CV:平川大輔）、哈茲（CV: 梶裕貴）、阿魯泰爾（CV:小野友樹）、貝迦（CV:羽多野涉）、恰皮塔（CV:濱田賢二）、迪涅芙（CV:井口祐一）。呢次劇本人物都係收歡迎人氣高企嘅人物，當中不思議之國神秘嘅瘋帽子同恰皮塔少有地出現係限定活動，而為呢幾位人物配音嘅都係現時熱門聲優。

今次《夢100》活動比以往現時活動內容更豐富高質，遊戲夢王國主頁設計靚咗好多，除此以外，活動配置專屬地圖，任務同關卡設置比以往單一任務活動更複雜多變。當中有啲關卡設有限制條件，例如王子屬性限制、王子星數目限制等，提升任務難度，考驗玩家為戰鬥配置同轉換唔同隊伍。遊戲靈活度提高咗唔少，令玩家儲活動點數時唔會沉悶。

「星曜之夜」活動注意事項

「星曜之夜」活動將會舉行到5月10號早上10:00。各位如果要得到浴衣版王子就要努力一齊爆肝。儲夠一定點數就可以獲得貝迦同迪涅芙，而其他王子就須要大家用妖精石同人品召喚。提提大家，於活動期間每日嘅13:00-15:00同20:00-22:00進行任務，玩家可以獲得兩倍個人活動點數。

最後為正在為浴衣王子而爆肝嘅公主們而乾杯！