無論你個年代係睇《網球王子》定係《新網球王子》，你應該都完全感受到呢套作品嘅兩樣特點：

（1）佢係擺喺 JUMP 上面嘅女性向漫畫（舊網王十幾年前稱霸過同人界架）

（2）佢唔係體育漫畫，而係特技格鬥 Play（係咪駁唔到先？）

咁網王作者許斐剛老師一向都鍾意玩突破，2015年幫自己出寫真集，今年同集英社就合作搞新企劃「新テニスの王子様 RisingBeat」，即係網王專用嘅音 Game！不過，個官網其實未正式公開架！而家仲係玩緊倒數角色公佈 Play，不過主角越前龍馬同埋神婆當年嘅男神跡部景悟大人就當然係遊戲主角群之一啦！

官方呀官方，角色我仲想要白石藏之介呀！！

至於個 Game 入面有咩歌就暫時未知……不過呢個 Game 擺明就針對女性玩家架啦，所以遊戲收錄歌曲好有可能係動畫主題曲以及角色歌（Character Songs），即係賣聲優囉，係而家最常見、同時亦係最穩健嘅銷售商法（喂），有當紅聲優坐陣嘅話，點都會有人課金！

以下為《新網王》動畫版一代 Opening 以及其中一首角色歌，比大家試聽吓～

網王啲聲優歌都幾有 Heart 架，啲歌同幾切合角色本身嘅性格，例如當年跡部景悟嘅個人大碟《破滅への輪舞曲》名，其實就係佢嘅招式名！所以如果個音 Game 都用返呢種心思黎整歌嘅，我又吹佢唔漲嘅！

因為《新網王》同《網王》其實係兩套作品黎，唔知個遊戲會唔會收錄埋《網王》嘅故事或者係動畫／角色歌喺入面呢？如果會嘅應該仲可以吸引埋班舊 Fans 回坑懷愐吓青春！

遊戲預計 2017 年末配信，iOS ／ Android 同步推出，免費下載但 app 入面要課金……有興趣嘅朋友不妨 Bookmark 咗佢嘅官網留意最新動向吖！

官網傳送門