係Wii年代差唔多人人都會有一隻既 Ubisoft 名作賤兔，黎到 NS 年代我地好快又可以再見到呢隻野啦！我地得到最新既情報，呢隻新既賤兔係會同 Mario Crossover，Game 名就叫做《Mario + Rabbids Kingdom Battle》，型式屬於動作冒險類型！

遊戲可以選用既角色有 8個，每個角色都有自己戰鬥方式，當然亦都唔少得升級同收集武器啦。至於果8個角色分別係著住唔同 Mario 角色衫既賤兔同埋 Mario、Luigi、Peach同 Yoshiki，咁當然唔排除之後會透過 DLC 加人物。

啲名好正……鷹眼 LOL

有得 Upgrade 架！

已知既係將會支援 2 Players Local Co-op，雖然採用回合制，但係有得 Dash、團隊合作跳躍等等，睇個勢有機會唔係行指令而係自己手動打。

遊戲內容方面將會提供 4個世界探索、有解謎要素同隱藏區域並且會有豐富既 Mario 世界彩蛋，另外每個世界都會有 7種類型既敵人同埋1隻 Boss，而且故事模式係會有最少 20個小時既長度，都叫做幾豐富！

遊戲預計會係 6月 E3 正式公布，正式見街就大約係 8月，機種係 Nintendo Switch (成隻Mario係度唔通出係 PS4咩……)，售價就未知住，不過大家都會買架啦，係咪？