之前小妹寫過篇《我係雪豬那》（いけにえと雪のセツナ ）嘅遊戲包膠（自己嘅文自己推：按這裡），遊戲雖然係由 Square Enix 發行，但係創作團隊其實係一家叫做 Tokyo RPG Factory（TRF）嘅新公司；佢地尋日剛剛公佈咗全新作品《Lost Sphear》，對應平台為 PS4、Switch 及 Steam，預計推出日期為 2018 年。

官方正式嘅故事簡介仲未出，但係 Trailer 就出現咗部份劇本描寫，例如「要是你所愛護的，都化為虛無」等，大家都可以預計到《Lost》個劇本同《雪》一樣走哀愁風。

廣域地圖探索：繼續走繪本風格

Trailer 係英文嘅話，預計日英文版本會同時推出？

咁講返少少 Background 先：《雪豬那》係 TRF 嘅第一個作品，你問我，我當然會老實話你知：個 Game 的確有好多可以改善嘅地方，例如係戰鬥過程唔夠順暢、地圖嘅探索比較單調等等；不過，對於故事氣氛嘅營造、人物性格嘅描寫、配樂等等方面，佢做得非常細膩！所以我都好奇，到底吸收咗經驗同埋玩家嘅意見之後，《Lost Sphear》會有點樣嘅進步呢？

場景設計目測細膩：水流會隨風向流動

消失嘅人類、失落嘅文明……兩者又有咩關聯呢？

雖然已知資訊唔多，不過睇黎戰鬥系統進步咗噃，睇片就幾 Smooth，界面都比《雪》更加清晰簡單！

戰鬥畫面明顯比《雪》設計更為簡潔

比較有趣嘅地方係下圖嘅畫面。咦？呢個閃光、仲有角色頭像上面嗰一點藍光，似乎遊戲會繼續用返《雪》嘅「剎那戰鬥加乘」！仲有一樣嘢就係，圖中嘅企鵝怪，都喺《雪》中出現過 Σ(*ﾟдﾟﾉ)ﾉ

如果戰鬥系統、畫面風格以及怪物都會重復出現，唔通 TRF 想建立一個好似 Final Fantasy 咁嘅 RPG 品牌形像？ 係咁嘅話，唔知《Lost》同《雪》嘅世界觀會唔會有所關聯呢？呢個遊戲對我黎講幾值得期待啊～

「只剩下月亮高冷地照耀著……」

最後為大家送上官方嘅 Trailer：）