《生化危機 血仇殺戮》全 CG 大電影令我睇到嘆為觀止，無論你是否 Biohazard Resident Evil 遊戲系列嘅 Fans，應該都會覺得呢套戲相當刺激：有打機嘅既視感之餘，亦有電影嘅張力！以下，喺盡量唔劇透嘅情況之下，等我同大家分享吓套戲有咩咁精采。

《血仇殺戮》故事講軍火販賣商 Arias 研究出新型生化病毒，Chris 作為生化恐怖主義安全評估聯盟「BSAA」嘅成員，自然需要前往阻止；但劇情一開始就話比大家知 Arias 嘅目的絕對唔係搵錢咁簡單：因為研發生化病毒，係佢向世界復仇嘅計劃！

個人認為 Arias 面相有幾分似 George Clooney

呢個角度仲似！

電影以《Biohazard》第二集主角 Chris、第三集主角 Leon、以及喺一片男人血汗入面嘅清流 Rebecca 三個人為核心。

Rebecca 又精靈又聰明又可愛！

而電影故事亦都同非常《生化危機》風格：病毒令全國陷入恐慌、女主角搵到方法對抗但比敵人拐走，仲要命懸一線、最後兩個男主角威風凜凜合力戰勝邪惡勢力，成功救返女主角仲阻止到個陰謀……

兩位男主角深厚嘅感情、信任同默契……對部份女觀眾黎講會好萌。

要知道無論係近戰抑或槍戰，遊戲系列一向有大量動作場面，《血仇殺戮》都唔例外，角色舉手投足嘅動作都好流暢。

Trailer 都可以見到嘅畫面：群魔亂戰

Leon 快狠準

Chris 火力勁

用言語或者圖片好話比你知佢做得幾靈活，之前官方就發佈咗一條 Leon 車戰嘅片段，不如大家自己感受吓。

你可能會話 Leon 駛唔駛 Chok 到咁？Sorry！呢個清晰嘅角色定位我反而覺得係賣點，Leon 嘅不羈同埋 Chris 嘅一板一眼，唔單止起到互相映襯嘅作用，仲令到觀眾更易掌握到佢地嘅性格。

我的背後就交給你了！

講完動作部分，我地黎講吓文戲。除咗槍彈拳頭做得精彩，劇組對於其他細微嘅部分都做得好用心，包括角色嘅神情，例如係兩位主角目擊 Rebecca 遭拐走時嘅一幕。

網路截圖效果可能差少少：（

奸角 Arias 嘅劇情好精采，中二到爆嘅性格超搶戲！同埋佢嘅故事絕對說明咗：癲佬之所以為癲佬係一定有原因（笑）

連眼神嘅部份都做得非常像真

其他部分仲有：各種材質嘅質感（服裝、地板），以及配合角色動作而變得鮮明嘅肌肉線條，都可見製作群嘅用心！

結果半場戲我掛住望 Chris 哥啲肌肉 orz

戲入面另外一個必須要提嘅看點，係驚慄嘅部份……因為清水祟老師係部戲嘅其中一個監督！清水祟呀！拍咒怨嗰個導演！唔知你有無睇開佢嘅電影，但人地有「日本恐怖大師」嘅美名咁就當然有原因！

黎到《血仇殺戮》入面，係故事一開始 Chris 帶隊進入廢屋探索，成段劇情喺氣氛上面嘅營造真係令人心寒到呢……

我睇到呢一幕時個心尖叫一下：嘩鬼仔俊雄呀！（誤）

紐約淪陷都唔夠鬼仔俊雄出現恐怖

講到呢度，唔知有無引起大家入場嘅意慾？其實，利申，我本身唔係遊戲系列嘅 Fans ，因為我一向對喪屍題材苦手，我好驚爆頭呀噴血呀之類嘅遊戲，，但係我睇完套戲之後，簡直想挑戰自己玩返呢個系列，真係好鬼刺激又零冷場！

題外話：如果有機會我都樂意睇多一次，因為首映睇嘅係英文版，但係日文版 Leon 嘅聲優係森村智之啊！森村智之一向都好 Chok，仲喺某個配音界別有帝王之稱！我好想睇一次佢聲演嘅版本！

我準備去睇第二次啦，你地唔係唔入場啊？