專業電競主播:「點睇香港電競音樂節」

香港電競音樂節--由旅遊發展局主辦,結合咗LoL表演賽同韓星演唱會嘅一個嘉年華。因為我自己對韓國文化、明星真係冇乜認識,所以我都係乖乖地,純粹以一個Video Game Commentator嘅角度吹下呢件事,同埋睇下香港(有留意電競嘅)人。

 

「電子競技」喺香港近期都算急速冒起,但係對比起外國嗰啲已經發展完善嘅體制,只可以算係細路仔玩泥沙嘅級數。不論係數量定係質量-公司、比賽、人材、種類嘅多寡同質素都係拍馬都追唔上。

 

而今次呢個活動最大嘅意義好明顯係代表住「政府支持」。

韓國政府投放極多資源以發展資訊及文娛產業,當中包括了電子遊戲及其衍生的電子競技業;

美國政府承認電競選手為傳統運動員、資助電競戰隊及向世界正名電子競技;

中國政府將電競納入為正式體育運動項目、國家體育總局及地方政府均有支援電競發展之實例。

到咗今日,終於到香港政府支持電子競技產業,淨係以今次活動嚟講,老老實實唔係話好幫到手,但係最起碼都係政府正視呢個產業嘅第一步。

 

 

我自己就覺得今次完完全全係一件值得開心嘅事,始終我唔會要求守舊又垃圾嘅香港政府會一嚟就改革教育體制,將電子競技納入課程;體育制度上全面認可電子競技,接納電競選手及教練為運動員身份。簡單啲嚟講,香港私底下都搞咗電競一段時間,而家政府肯表個態支持已經好好,起碼係一個好開始,之後有冇支援,詳情係點樣搞法咪之後先算。

 

但係香港人唔係咁諗,令我驚訝及感到失望嘅係年青一輩嘅反對之聲。雖然香港對任何嘢都係屌多過讚,一句Support好似要咗佢條命,屌少句就好似執輸行頭咁。但係有咁嘅習性唔代表我要認同,所以而家就同大家睇下佢地屌啲咩。

 

「又係得LoL」

你可以話LoL垃圾Game,你都可以話玩LoL都係戇鳩仔,但係揀呢隻Game完全係合理同明智嘅做法。無可否認,香港最多人玩最多人理就係LoL,即係確保有人睇有人理;喺香港嘅LoL人材比其他遊戲嘅人材多及更有知名度,同時嚟自外國嘅嘉賓普遍名聲都比其他遊戲高;喺香港搞過嘅LoL比賽亦都比其他遊戲賽事多,即係有經驗,柒極有個譜。

香港擁有大量 Fans 既LOL戰隊「閃電狼」

 

平時咁乸保守嘅政府第一次出面支持電子競技呢啲新興行業,我自己就唔會望又CSGO又StarCraft又Dota2又爐石又WoW又Rainbow Six又街霸……所有嘢都要循序漸進慢慢嚟,冇可能望佢一步登天,屌少句畀多少少時間佢發展下真係唔得咩?一定要屌低其他Game嚟令自己嗰隻搞得成咩?

 

舉個例,如果而家一嚟就搞埋Rainbow Six,陣間睇嘅人又少,又人人都屌啲外國知名選手冇人識,香港又冇咩有認受性嘅人材畀人睇,成個比賽流程又柒下柒下咁,到時政府見呢行又柒又蝕,以後唔撚搞Lu,咁咪皆大歡喜囉係咪?

外國 Rainbow 6 比賽觀看人數絕不失禮

 

政府有幾揼春就真係大家都知,但係我依然會想香港嘅電子競技行業會有政府認可及支持,將就下今次淨係得垃圾LoL真係咁難,需要咁刻薄咩?

 

 

「關韓國音樂乜事」

係!係唔關事!搵都搵唱過LoL世界賽主題曲嘅Imagine Dragons呢啲外國Band嘛,我明!但係平心而論,以成個香港嚟計,外國Band多人支持啲定係韓星多人支持啲?冇統計資料喺手我真係唔敢講,但係哈韓嘅少男少女就一定癲過外國Band嘅擁躉,佢地真係可以為咗見偶像一面、握個靚手就仆到去搶飛攞靚位。

Imagine Dragons

而咁樣代表咩?成個嘉年華有Noise囉,巴閉囉,型囉威囉疊馬囉。你估香港政府,甚至贊助商廣告商理唔理你電競意志、體育精神丫嗱,有人氣有商機就投資,冇嘅唔通真係一句「撐真電競」就倒錢落海咩。你估請Nicholas_HK、byun嚟有冇人理?請1122、PENTA Sports嚟有冇人睇?Humanbomb都畀人話識你老鼠,你就知根本連圍內人士都唔撐電競。

 

香港而家個情況係連系統同體制都冇,就好多嘢都要將就下,因為會出錢嗰啲金主都係睇商機,唔會聽你崇高理念「為真電競」就送錢你洗。即係家陣冇辦法靠純過蒸餾水嘅電子競技可以做得起,未能單靠呢個排頭就吸引到足夠嘅商機,就唔多唔少都要滲啲雜質幫下手,電競圈中人唔想,但係冇辦法。為咗將來可能可以拋開所有唔關事嘅嘢,增加唔同活動中電子競技嘅純度,我會選擇停止屌鬼。(我都唔鍾意韓國音樂,淨係鍾意睇)

 

成單嘢對香港電子競技發展係有益嘅,支持下而唔係屌到佢收皮真係唔得咩?我就唔覺得外界會因為呢個Event就將電競同韓星掛勾,就算真係會,未來電競發展好咗,體制完善咗就實有機會教育返大眾咩先係真正嘅電子競技。

 

香港而家冇嘅嘢太多,做到嘅嘢太少,我地真係唔可以要求所有嘢都一步登天。冇人材咪培育,而唔係成長期就屌到佢唔想再做;冇體制咪建立,而唔係得條戰隊未有俱樂部體系就不如收山唔好搞。係啊香港人信奉百屌成材,但係屌到冇心做佔99%,成功例子等你話我知。Toyz係台灣隊打個冠軍返嚟,無法避免、神J奇、Tabe等等都係靠中國電競而發展起,Amaz出名真係關香港春事。有冇邊個真係喺香港而成名,仲有多謝各位香港人一直屌到佢成材?

知名爐石選手 Amaz

唔係要各位錯嘅都盲撐,但係有時有啲嘢在於是非黑白之外,唔會做臭個名嘅,撐下冇壞嘅話唔好咁harsh,唔會死的。

 

 

Devils

多元化遊戲主播,電競比賽旁述 https://www.facebook.com/devils0459/

追蹤

更多文章 網站