【新作始動】拜拜桐生大叔…人中之龍八月公佈新主角!

唔知在座(?)有幾多朋友同我一樣係《龍が如く》系列嘅忠實 Fans?

 

1-6 代正傳、0 前傳、見參同維新兩個外傳、仲有暴走版 Of The End;不知不覺地原來我都對咗桐生大叔十幾年,老老實實,無論大家覺得以佢為主角嘅最終章《人中之龍6 生命詩篇》好唔好玩都好,作為一個回憶嘅完結,一諗到桐生喺呢個系列終於要功成身退,都仲係好唔捨得 (´・ω・`)

桐生醬嘅前半生造型變化(無誤)

 

雖然係唔捨得,不過講真,有時啲嘢見好就收,都係好事!

桐生都就黎五十歲,真係大叔黎架啦……東城會嘅事,就不如放過佢啦(喂)

 

好多朋友誤會《人中之龍6 生命詩篇》係系列最後一集,其實唔係架!係桐生醬嘅最終章黎架咋!《人中之龍》系列係 SEGA 頭牌之一,公司又點會輕易比佢完(喂)

 

靜咗一排,くスタジオ尋日終於有動作啦!

佢地將會於 8月26日 日本秋葉原 UDX 舉辦新作發表會!

 

以下純粹為個人 FF 

 

到底會係用全新主角去開創新嘅系列神話,定係佢地終於肯推出全世界玩家都等好耐嘅真島BB正傳遊戲? 有玩開嘅朋友應該都唔會否認,真島嘅存在感其實比桐生醬仲要強大 w

我超級無敵不能自拔地鍾意呢個角色

 

真島對桐生嗰種「越重視、越偏愛、就越要欺負他」但係危難當前就會二話不說出黎幫桐生擋子彈嘅愛……我指兄弟道義…嗰種愛……OK?總之真島呢個角色人氣仲高過桐生,如果今次係出佢嘅正傳,我一定訂 Premium Box 呀 LOL

 

不過亦有傳新作可能會做返《龍が如く 5 :夢、叶えし者》四主角線咁嘅操作……嗯……如果係咁我就覺得麻麻地喇,好似《龍が如く0 誓いの場所》咁桐生 + 真島 Switch 住黎玩雙主角線我覺得都 OK,但多過兩條主線我其實覺得有啲難以投入……

 

講咁多都係估嘅!

8月26日我會緊貼日本方面消息,馬上同大家跟進到底新作係咩一回事!

 

Fans 們請同我一齊期待啊 (ゝ∀・)⌒☆

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章