舊年出嘅《Persona 5》前幾個月仲要出埋中文版，相信大家應該都打爆機了？（笑）

我一向係《P》系列嘅 Fans，雖然我係三代先落坑嘅orz，但係 3－5 代我都玩得好開心！《P》唔止故事精采、劇本出色，而且系列共享同一套世界觀，如果一直有玩開嘅份外有親切感！而且，系列中入面出色而充滿時代感嘅配樂，亦都係遊戲特色之一。

以《P5》為例，你想知劇本有幾吸引嘅可以【睇呢度（對唔住我又推自己舊文）】

如果有玩過《Persona 4》嘅朋友，應該都會記得官方 ATLUS 喺遊戲推出之後無耐，出咗隻《Persona 4 Dancing All Night》？當時個 Game 因為淨係落左 PSV 度，所以好多朋友都 Miss 咗無玩到。

P4D 遊玩影片【Dazzling Smile MV 版 By. Marie（CV. 花澤香菜】

官方剛剛宣佈好消息：就係：《Persona 3》同《Persona 5》將會同步於 2018 年春季登錄 PS4 及 PSV 平台！

3 代《Dancing Moon Night》

5 代《Dancing Star Night》

雖然見到官方一係唔出 game，一出就出哂兩隻 Dancing 系列，我第一下反應係「吸金吸咁盡啊～～」；不過，對於玩開系列作嘅朋友黎講，可以藉由角色舞動去聽返遊戲入面嘅配樂，應該會係咁諗返起故事嘅情節，甚至會好想即刻玩返個 Game！

遊戲中除咗收錄遊戲入面嘅配樂之外，部份歌曲亦會有全新 Mixing；而主題曲或者角色主題歌，按照上集 P4D 嘅習慣，應該仲會有特別嘅動畫或者影片睇添！話雖如此，呢個 Game 都有難度架！玩 King Hard Mode 時我都玩到出手汗吖！不過，遊玩樂曲得到嘅分數可以幫各個角色解鎖造型（換句話講，你想點惡搞佢地啲造型都得），遊玩性其實都高架。

不過，如果你認為《Dancing》系列始終比較 Fans 向，唔緊要！

仲有一個好消息就係：《Persona Q》要出第二集啦！

《Persona Q2》目前應該釋出嘅情報唔多，只知道佢同上集一樣，目前只會登錄 3DS 平台。嗯～如果落埋 Switch 就好啦！記得 Switch 剛剛出宣傳片嘅時候，我明明見到過《Persona》嘅片段架！我原本仲以為呢隻 Q2 會落 Switch 添 orz

如果有《Q2》嘅最新消息會再同大家匯報！

至於兩隻《Dancing》系列……反正下年春天先出啊！大家有時間不如玩咗 P5 先啦！（笑）

最後送上 P3 及 P5 兩隻 Dancing 的遊戲 Trailer：