【人中之龍記者會消息總匯】《極2》《北斗が如く》仲有《人中之龍 Online》!

人中之龍 Studio(龍が如くスタジオ)喺剛剛過去嘅星期六舉行咗新作發佈會,一口氣公佈咗三個新消息!大家應該同我一樣,喺《人中之龍 6》桐生線完結之後,一方面好想知道「到底下一個主角係邊個」,一方面又會覺得「無桐生一馬就唔係人龍啦」;以下為大家總結咗發佈會嘅三個新消息,唔知你又會唔會期待呢?

 

【人中之龍 2 HD 重製】《人中之龍 2

如果有留意開 VJG 嘅朋友應該對呢個消息唔吃驚啦!因為記者會前一晚,呢個消意已經「意外流出」了(笑)如果你係人龍 Fans 而當年未有機會玩過《人龍 2》嘅朋友,我個人就極力推介你玩呢個重製版!

 

《人龍 2》係緊接住桐生解決一億圓事件後嘅故事,除咗東城會,關西近江聯合嘅郷田龍司亦係主要角色之一;舞台亦首度由神室町拓展至大阪蒼天堀,當年呢個地域擴展嘅玩法令到好多玩家好開心的(笑)

 

比較特別嘅係,真島 BB 人氣高就唔駛我多講,所以幾時會出佢做主角嘅遊戲?……… SEGA 又點會真係順我地意出一隻「淨・真島 BB 傳」吖,真島賣點咁大,梗係將佢斬件賣啦(喂)所以同上次《極 1》一樣,真島戲份會增加之餘,今次《極 2》仲允許玩家操控真島進行部份劇情!

上次《人龍 The End》都叫有比玩家用過真島嘅……但嗰個係暴走嘅外傳,點同!

 

惟一可能美中不足嘅係…又或者係我唔慣啦…《極 2》如無意外,會用返《人龍 6》套新開發嘅 Engine,所以戰鬥模式應該都類似(我當時對佢評價就一般啦,有興趣嘅朋友可以睇返「人龍 6 包膠文」)希望事隔一年個系統有改善到啦。

 

官方 Trailer 都出咗啦!

【上市時間】2017.12.07

【語言】日文・繁體中文

 

《北斗神拳 x 人中之龍》

呢個消息喺日本公佈時就好爆嘅,但係我自己睇完就淆淆地;因為《人龍》開發咗自己新系統之後,首發居然唔係自家劇本,而係同其他作品合作,咁係咪意味住 SEGA 想好似 KOEI 咁,開左個「無雙」系統出黎之後,就主力同其他作品合作咁呢?

呢套中文應該點譯?北斗之龍?

 

《北斗》嘅故事係點?對唔住,我唔係好熟…因為呢套嘢太屈機、太肌肉、太漢子,所以原諒我無睇呢套作品嘅原作,我淨係睇過一集 OVA 咁大把!男性玩家可能會好期待,但對於女性玩家黎講,我一知道係 crossover《北斗》我有少少唔識反應(喂)

好處係:聲優無轉,主角聲優繼續係黑田崇矢(心)

繼續係千山我獨行不必相送~

不過「人龍系統+北斗招式」呢一點,我都幾好奇會有咩火花!

 

《北斗》個故事咁長,係咪即係話黎緊至少 5 年《人龍》都係玩《北斗》劇本呢?遊戲仲尚在開發中,目前仲未有官方 Trailer 以及發售日期公佈,大家點睇呢隻 Game 不妨睇完本文留個言話我知吖!有最新消息神婆都會繼續同大家匯報的~

 

【人中之龍 Online

你無睇錯,係 Online 版!沿用「人龍」世界觀,主角「春日一番」係一個喺神室町長大嘅孤兒,比露宿者養大。有一次佢比人蝦,比「武闘派極道の荒川」(即係東城會入面嘅勇武派)救咗,從此春日視對方為恩人,並加入東城會荒川組。後來,因為同組有大佬犯罪,春日幫對方食死貓,坐咗 17 年監。

 

Online 版,就係講春日放監之後,重回神室町嘅故事。

春日一番人設圖

 

呢個「人龍 Online 版」係由主角春日一番嘅聲優中谷一博以及「人中之龍」系列 Team Producer 山昌義兩個人提出嘅作品,目前所有角色 Casting 以及玩法都仲未公佈的;不過遊戲野心就相當大,亦都好緊貼市場潮流,除咗對應 PC 之外,亦會同時落埋 iOS 及 Android!

 

以上就係新作發佈會嘅三個新 Game 消息,唔知大家睇完又有咩感想呢?

神婆

為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章