無雙類型既遊戲大家都好似玩到滯滯地，不過溝埋《銀魂》成件事又好似 OK 啵 (反正都係睇故事架啦)，黎緊由 BANDAI NAMCO Entertainment 製作，預定 2018 年 1 月推出既 PS4 / PS Vita 無雙 Game《銀魂亂舞》推出咗首條宣傳影片同特典與及限定版資訊。

《銀魂亂舞》屬無雙類型遊戲，玩法就唔講啦……最主要係除咗主角坂田銀時、志村新八同神樂之外，仲見到桂小太郎、岡田似藏、高杉晉助等等人都有得用 (我要定春阿！)，同時仲會收錄全 8 話「長篇追想亂舞」，基本上滿足晒 Fans架啦！

而成隻 Game 最重要既就係早期購入特典係還原度極高既「新阿姆斯特朗旋風噴射阿姆斯特朗砲」，睇幅圖完全唔知有乜用……唔通係武器黎？至於預約特典就係收錄咗「一決勝負台詞考案」篇既廣播劇 CD。

遊戲主題曲「Scramble」，由 SPYAIR 演唱

普通版以外仲會有「初回限定生產版 AV Edition」，將會收錄電視動畫版 16 首 OP / ED 原音版同埋限定既60 種一決勝負台詞。