【人龍極2 訪問會 桃乃木篇】

尋晚有幸參與 PlayStation《人中之龍 極2》嘅訪問，桃乃木香奈小姐真人嬌小可愛！佢本人表示，能夠參與《人龍》系列感到既興奮又開心，相較平時嘅工作，單純以聲音演繹角色非常具有挑戰性。

為咗做好角色，加上同行前輩如波多野結衣小姐都曾經出演過遊戲，桃乃木小姐亦都有參考其他人嘅表現，仲詢問咗身邊有玩《人龍》系列朋友嘅建議，務求做到最好，「不過我知道尚有不足的地方，我會繼續努力的。」

桃乃木小姐更表示，知道有女玩家都支持遊戲系列感到特別高興，因為能夠令到受各個界別嘅人欣賞自己嘅表現，係佢一直以黎嘅事業目標。

各位玩家，我地就一齊黎期待桃乃木小姐喺遊戲中嘅出演吧！《人中之龍 極2》12月7日正式發售！

【人龍極2 訪問會 名越稔洋及佐藤大輔篇】

相信大家對《人龍》最期待嘅其中兩樣嘢，一定係真島吾朗嘅動向，以及桐生篇完結後，到底仲會唔會有其他角色嘅外傳或主線出現。

名越先生與佐藤先生聽到發問後會心微笑，佢地笑說「真島吾朗的人氣是一集比一集增加，在剛剛過去的《人龍6》裡面，真島戲份少了，有不少粉絲都向我們表示不滿啊！」

佢地表示，佢地非常重視玩家嘅意見，雖然目前未能透露未來重製的計劃中會否繼續增加真島戲份，不過佢地就強調「粉絲想要的，我們都會努力去做。」

不過佢地亦坦言，團隊人手只能夠同時專注於一個企劃上面（意指《北斗之龍》），所以《人龍》目前應該會著重於提昇往後重製版嘅畫質同劇本之上；佢地又提到，重製版使用嘅人龍系統係想玩家感受到「無縫戰鬥及探索」的樂趣，希望舊粉絲再遊玩遊戲時會有新嘅體驗。

左：名越稔洋 右：佐藤大輔

名越先生表示，《極2》出現嘅鄉田龍司係佢極為喜愛嘅角色，目前為止，佢認為自己都未能做出一個超越鄉田咁鮮明立體嘅頭目角色；而佐藤先生則表示，「我最喜歡的還是桐生啊！不過真島人氣都要比他高了。」呢番幽默發言令在場記者都不禁笑了起來。

訪問會中途發生咗小插曲：話說我地網站嘅女編輯問到真島吾朗嘅時候，兩位監督不禁笑住問「妳有多喜歡真島？為什麼？」女編輯當時回應「超喜歡的！因為真島很帥氣，而且比桐生更人性化啊！」兩位監督聽完答案，搖頭嘆氣，然後勸勉一句，「喜歡這樣的男人很危險很辛苦啊！我勸妳就不要難為自己了。」

感謝兩位監督製作人友善耐心地回應在場記者提問，睇黎往後嘅《人龍》重製版仲係會充滿住唔同驚喜！《人中之龍 極2》12月7日正式發售！