【嚴重洩密】 LEGO保密嚴重漏動 Tron Legacy Light Cycle人仔被流出

十一月嘅時候大家都知道 Tron Legacy Light Cycle 將會於2018年成為 Lego Ideas 產品生產,但最終嘅產品設計同發售日期全部都未有確實資料。

但尋日有人就喺網上一啲 LEGO 嘅交易 Group 度放售一套三隻話係《創戰記 Tron: Legacy》2018 嘅 LEGO Minifigures。因為《Tron Legacy Light Cycle》到現時都未有任何最終設計圖片,而且今次除左官方廠商之外,並且牽涉玩家們創作後嘅保密情況。咁為左查證真偽,當然第一步就問清楚其實係唔係「第三方印刷品」,而對方亦表明唔係「第三方」出品,而相約交收期間都有問及「貨源」,而賣家都冇正面回答,而且都叫我「唔好問啦!

拎過上手細睇過,的確係同市面上正版貨印刷上完全冇分別,而且有啲細位係未必第三方製作者會留意得到。

例如Quorra 手臂嘅紋身

而大家作為玩家最重點嘅當然想知呢件野究竟係咪最終出品設計以及佢嘅真偽,又或者好多人會質疑以上嘅都係「第三方印刷品」或者係「翻版」貨,但我搵到一個實證可以指出呢佢嘅真偽可信性。

每一件 LEGO 出廠嘅組件其實都有「LEGO」字樣印喺組件上面(唔信的可以拎你嘅LEGO出嚟睇睇),而我手上嘅「疑似Rinzler」Minifigure 嘅頭盔當然印左「LEGO」字樣,而且呢個頭盔嘅模組係嚟自上年嘅 76077 Iron Man: Detroit Steel Strikes 同 76083 Beware the Vulture 中嘅頭盔組件,但係暫時係未有見過黑色膠所生產嘅版本。

所以更加代表到最少呢個一定係嚟自未來嘅產品

講到尾,LEGO 被流出一啲未發售或未公佈嘅產品其實唔係第一次,而對上一次比較明顯嘅就喺《LEGO Thor Ragnarok 雷神奇俠3:諸神黃昏》產品公佈當日就有人公然售賣鬥獸場造型嘅 Hulk。呢類型事件都似乎喺大陸設廠之後開始發生。咁兩者之間有冇相關?有唔少嘅 LEGO 玩家組職都有同過官方反映呢個問題,但官方嘅對策又係點?

作為玩家擔心嘅話就等到官方發售日期或喺有信譽嘅鋪頭原 Set 買就穩陣啲,始終呢啲不明來歷嘅製成品就算比你貪快買到,可能當中有啲我地都未知嘅問題存在,自己三思啦!

阿九

打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast //goo.gl/HRnxDW

追蹤

更多文章