新手們初來乍到，總會唔係幾明到底爐石啲職業到底係點黎，同埋到底果個職業有咩特性等等，所以就令成件事都變得好不明所以咁。而呢一系列既爐石英雄傳，小編就會揀3個新手們都會唔明既職業同大家講下，到底果個職業係有啲咩特性。

自然的守護者 ─ 德魯伊

「德魯伊」呢個詞彙如果唔係有玩魔獸既人，可能會覺得好陌生，甚至會疑惑到底乜野係「德魯伊」呢？

但其實「德魯伊」就係魔獸/爐石入面其中一個職業，而呢個職業就係祟尚大自然既力量，再用大自然既力量去守護番大自然。所以大家就會見到「德魯伊」呢個職業，入面會有好多關於大自然既法術，好似「自然化」丫、「野性成長」咁，插圖入面都會有好多樹葉飛黎飛去。

而「德魯伊」除左可以利用自然既力量外，仲有一種力量就係可以同大自然既動物同步。同獵人唔同，獵人呢個職業係馴服動物，再同自己馴服既動物一齊並肩作戰。但「德魯伊」呢，則係利用變身法術，將自己「變」成動物，再用野獸既力量去瓦解敵人，所以點解德魯伊既卡牌，會有咁多「野獸」相關既卡牌，好似「揮擊」或姐係「利爪德魯伊」咁，都係利用緊野獸既力量去戰鬥。

瑪法里恩‧怒風？他是誰？

如果要用一個人物做成個職業既代表，當然就係要用一個係呢個職業度登峰造極既人物黎代表呢個職業啦！而「瑪法里恩‧怒風」，就正正係呢個人選啦！

瑪法里恩呢個夜精靈德魯伊，曾經多次拯救艾澤拉斯無數既生命，仲有曾經拯救過牧師英雄「泰蘭妲•語風」同知名既「伊利丹‧怒風」〈伊利丹是瑪法里恩的弟弟〉。除此以外，係「死亡之翼」破壞呢個世界既時候，瑪法里恩更召集德魯伊同伴們再次守護艾澤拉斯。當中更協力迎擊「炎魔拉格納羅斯」添。被「塞納留斯」祝福既瑪法里恩，作為大德魯伊當之無愧！

德魯伊爐石介紹

德魯伊呢一個職業，同聖騎士其實有幾分相似。因為兩者都能夠利用英雄親身攻擊黎控制場面，又能夠以法術回復自己既生命。不論係魔獸世界定係爐石，都係一個又能打又能補既萬用職業黎。如果新手初入坑唔知玩咩英雄好，其實都可以考慮下主力研修德魯伊呢一個職業。

德魯伊既卡牌，有一樣係「德魯伊」卡牌先會有既效果，就係「二選一」啦！對於新手或者中手黎講，「二選一」既法術同手下，都可以照顧到唔同場面既需要，係新手經驗不足有機會出錯牌既時候，更多既「二選一」卡牌將可以彌補到唔同既不足。就好似德魯伊卡牌「森林看守者」咁，係而家沉默愈黎愈渴市既狀況底下，4費既2/2「森林看守者」就俾左好多新手朋友們一個額外既選擇，用2攻擊黎清場又得，沉默一啲被動技能超強大或者係得到強大法術加持既手下亦得，係非常之好用既新手牌！