爐石戰記入面既彩蛋非常之多，如果要逐張卡牌講的話，可能幾十篇文章都唔夠講呀！所以呢一集既爐石戰記彩蛋合集，小編就為大家搜集左一啲比較有趣同埋內容豐富既彩蛋俾大家認識！
炸雞勇者
「炸雞勇者」呢一張卡牌，其實可以話係魔獸世界玩家入面既一個共同回憶既產物。「炸雞勇者」卡牌入面既角色，其實係一位叫做「Leeroy.Jenkins」既魔獸世界玩家。當時網上瘋傳既一條影片，係講述Leeroy同隊友一齊玩魔獸世界既時候，同隊友講要出去買炸雞要AFK一陣，結果隊友傾傾下戰術既時候，Leeroy.就突然番左黎仲沖左入王房瘋狂引怪添！Leeroy.瘋狂踩龍蛋，開左大量既小龍怪出黎，最後隊友逼不得已陪左Leeroy殺左入去王既房間，係Leeroy亂衝亂撞既情況下，Leeroy一團人當然難以避免地團滅左啦！
而呢條短片係當時非常火熱，仲成為左一眾魔獸世界玩家既共同回憶添！所以點解炸雞勇者會有衝峰技能(笑)，仲會有2隻小龍怪成為敵方既手下！而語音方面，攻擊既叫既「時間到了，咱們動工吧！」就係Leeroy番到黎講開波既用語，而陣亡時「至少我吃到雞肉了」則係Leeroy係滅團後講既句子。
威爾弗雷德‧菲斯巴恩 & 賈拉克瑟斯領主
「威爾弗雷德‧菲斯巴恩」係魔獸世界中銀白聯賽其中一個情節既地精術士NPC黎，而威爾弗雷德係當中既功用，就係為玩家們召喚一名強大既惡魔，再等玩家去挑戰以磨練自己既實力。但過程中威爾弗雷德亦一如地精冒失既特性，誤召左超強大既「賈拉克瑟斯領主」出黎，結果「賈拉克瑟斯領主」反客為主將威爾弗雷德擊殺，並企圖開啟傳送門俾燃燒軍團入侵艾澤拉斯。所以點解「賈拉克瑟斯領主」既戰吼會係取代玩家既英雄繼續戰鬥，其實就係響應魔獸世界中呢孑段既情節！
而係爐石入面，當玩家利用卡牌將自己變身成「賈拉克瑟斯領主」時再打出「威爾弗雷德‧菲斯巴恩」的話，「賈拉克瑟斯領主」將會額外講一句「卑微的地精！你的傲慢將使你喪命！」，而呢一句，就係「賈拉克瑟斯領主」擊殺「威爾弗雷德‧菲斯巴恩」前講既一句說話。而「我才是老大阿」就係「威爾弗雷德‧菲斯巴恩」死前既一句嘴炮。
預言者費倫
預言者費倫可以話係近期冒起得最快既經典傳說牌啦！如果有留意到爐石入面既種族同人物設定，可能玩家都會發場覺魔獸世界/爐石戰記，其實同魔戒入面係有啲相似。而呢一個彩蛋，亦都係節錄左「畢爾博‧巴金斯」作既詩其中一句「Not all those who wander are lost」黎做預言者費倫被打出時既對白。(中譯：並非所有流浪者都是迷失路途)
伯瓦爾‧弗塔根 / 「龍焰之血」伯瓦爾
「伯瓦爾‧弗塔根」呢個角色，可以話係巫妖王系列故事中最可歌可泣既角色啦！係國王瓦里安失蹤既時候，伯瓦爾作為攝政王代理暴風城既事務，甚至係天譴軍團入侵既時候，都係聯盟方士兵們既光明象徵。
而呢個張牌有2個版本，係因為「伯瓦爾‧弗塔根」最終被部落方既奸細陷害，最終死於憤怒之門，身中天譴瘟疫既「伯瓦爾」被雅立史卓莎既烈焰淨化左之後，變左一個半死不活既人並被巫妖王擄走，所以點解「龍焰之血」伯瓦爾身上有被火燒傷既痕跡。
伯瓦爾‧弗塔根既效果「若這張牌在你手中，每當友方手下死掉，便獲得+1攻擊力」，大概係形容伯瓦爾係瓦里安失蹤時無私付出，成為眾人希望既象徵。
而「龍焰之血」伯瓦爾既效果，則係伯瓦爾係半死後繼續為世界付出(當上新巫妖王並冰封自己)既另一種象徵。