【新手MHW獵人日記】第二章:「只要不被打中,就沒有什麼大不了!」

第一期團長真係好似金毛獅王

打咗個幾星期《MHW》,好老實,呢個遊戲,真係打得多先會有進步;既然我話要成為獨當一面的獵人,我當然一收舖就衝返屋企返調查據點啦!雖然去到上位之後,隊友們進度各異,要刷嘅素材都唔同,不過我地 VJGamer 小隊入面嘅隊友真係相當有 Team Spirit,「你打唔打雄火」「你駛唔駛刷炎王」「喂阿邊個開咗任,不如入去幫佢打埋」,Solo 無問題,但一齊打更開心。

喺我剛剛到上位時,連蠻顎龍呢啲廢龍佢地都陪我打 orz

不過我始終都係想自己打得好啲,老老實實,我拎重弩,講輸出,就點都唔夠班拎充能斧、太刀嘅朋友黎;但係人總需要勇敢生存,任何一條龍,我單挑都過到的話,先算叫做識打架噃,如果唔係我都只係一隻識幫隊友派粉塵嘅菠蘿雞咋噃。

我玩《MHW》嘅意義係咩先?純粹係想爆機咋咩?唔係囉,我係想學識打龍,想同隻貓&隊友們一齊成長囉!喺打完蠻顎龍嗰一晚,我痛定思痛。

借酒消愁示意圖

喺過去嘅一星期,我好認真咁去研究重弩嘅武器派生表,好認真咁睇下其實邊套裝先適合自己,從而去思考自己要打邊條龍,一步一步咁推上去。我開始狂打救難信號,總之有人開任,任務有位,我就去打。我唔係淨係要刷素材做裝,我係要練自己嘅技術。

話說當時輔仁總編容大人同埋 VJG 總編森麻,佢地比我嘅建議就係:「寧願打得慢,千祈唔好死。」呢個建議同 Gundam:0079 入面馬沙一句「當たらなければどうということはない(打不中就沒什麼大不了)」簡直有異曲同工之妙!

雖然我係睇 Unicorn 先知道呢句對白的 orz

喺我開始狂接救難信號之後,我終於體會到啲人不自量力地狂衝前然後狂貓車,係幾咁令人憤怒。

例如我去打櫻火龍,點解有人可以唔帶閃光彈架?又點解成日有人貓車一次都仲唔識驚,要貓車貓夠兩次架?喂呀,有時啲任務有條件架,貓 1~2次就全部人收皮架啦,你死得咁密,做咩要咁勇武呀?你同《Gundam Versus》唔識打但係死都要用 500 機啲玩家有咩分別呀?

打雄火又係咁,條龍飛起時你唔放閃光彈、到有人騎咗,你又即放閃光彈喎,呢個係咩玩法?兩位網友私底下有仇嗎?然後,打到條龍就死,出骷髏頭啦,有人放咗陷阱,係咪應該一齊企同一邊引條龍落穴呀?點解有人會跳落樓下嗰層架?仲要跳樓嗰位人兄你貓咗兩次啦,好心你返去營地等啦!

當我係咁鬧啲三五識七嘅人時,我突然驚覺,原來我打咗 N 咁多次救難信號之後,不知不覺間,已經唔再係當初嗰個要人 Carry 或者落場無耐就貓車嘅廢柴;唔好貪刀,最緊要唔好貓……我開始發現,我已經減少左好多貓車次數,而係學識帶定一大堆粉塵救人同埋強化隊友。

同埋,我由以前唔識放閃光彈、去到 Default 自帶三個閃光彈、補給三個閃光彈、有必要時再帶定 10 隻光蟲準備隨時 Back Up……當我發現自己有呢種獵人意識嘅時候,原來,我已經不知不覺打到滅盡龍了。

不過打滅盡真係好考功夫,一係就帶夠回復藥、善用場地陷阱「落石」黎 Solo 佢;一係呢,就同隊友打算啦,我玩滅盡龍嘅救難玩到驚,連續三次打到佢骷髏頭嬲嬲豬時,啲話黎救難我嘅網友,輪流力盡!嬲到我呢!尾又斷唔到喎,打龍點解唔斷尾呀?就算你地死咗我都有條尾執吖?打佢肚腩做咩啫?仲有我食緊回復藥或者開緊機關槍時,做咩成日有人揮武器劈我架?!

我班隊友,天上天下超級無敵地可靠

經歷個幾星期晚晚獵人修行之後,我最新進度係打完屍套龍了,不過就唔係 Solo 咁叻豬,我都係入去睇完動畫,打咗一陣都係決定射救難 LOL(總編大人好似全部古龍都自己 Solo 打,痴線的~)

不過,喺連日來練習之後,我終於搵到自己喺戰場上嘅位置,而我亦都真心鍾意《MHW》呢個遊戲;搵到定位之後,再同隊友出去打,我都唔再有以前嗰種菠蘿雞嘅羞恥心,我諗,我係有少少成長的。

打屍套龍:Keep 住覺得個場好臭……

主線黎講,我今晚打埋鋼龍,就應該到下一條咩冥燈了,不過我仲差一條滅盡尾黎強化我枝重弩。另外,因為刷到素材可以整「龍王的獨眼」,仲特登轉埋髮型黎襯個眼罩 Orz

真島吾朗的眼罩(誤)請力量加持於我!!

下一篇日記就會係最終章了,雖然是個人遊玩的紀錄,不過謝謝大家閱讀,神婆合十感恩~

文章回顧:新手MHW獵人日記第一章】
延伸閱讀:新手MHW獵人日記第三章

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章