【新手 MHW 獵人日記】新春番外篇:「歷戰難打?麻痺蛙先係 BOSS 呀」

首先各位朋友唔好鬧我「喂明明話唔寫結果又寫」,之所以有呢篇《獵人日記番外篇》嘅出現,原因係我不約而同地收到幾位讀者嘅短訊,內容大致上為「打完個主線妳就唔玩嘅話好可惜啊」之類嘅意見。

咁當然我依然晚晚玩緊《MHW》啦(但係《Bayonetta》同埋《聖劍傳說》就出,我應該又要分多啲時間同時攻略幾個遊戲了…)我上篇文都提過,打完主線先係遊戲嘅開始啊,望住啲朋友唔知點解已經有百幾 HR 嘅時候,我除咗把口講一句「你 No Life 吖!」之餘,內心當然係滿滿嘅佩服。

咁,到底呢幾日我嘅進度又係點呢?

衝哂主線之後嘅玩法就係:挑戰唔同嘅任務、整裝、打歷戰、HR 解放……當然「要咩素材就唔會跌咩素材」嘅宇宙法則係 Always Exist 的,加上我呢個星期本身舖頭生意忙碌,少咗時間打《MHW》,進度當然比隊友們慢了。

於是當成班隊友話要打麒麟嘅時候,我懶到連防雷裝都無整,淨係帶住精靈加護 Lv.3 護石+三粒防雷珠就膽粗粗去打麒麟……

打歷戰真係好刺激 orz

保命救全家 /w\

呢隻癲馬(?)啲雷電 Play 真係煩過彈幕

如果你覺得麒麟唔難打,師兄你勁;如果打打下歷戰麒麟或古龍、然後亂入多一隻爆鱗龍時,你都可以一次都唔會貓,師兄你真係好鬼勁 LOL

麒麟就話閃電攻擊同埋快閃動作有難度啫,至於條死人爆鱗龍,佢真係好鬼煩,場場都見到佢,我連打奇面族你都要亂入做咩啫?唔理你你就追住我,好啦,我頂你唔順,我打你囉,你 M 吖嘛,吖,到我打你時你又發熱發亮開始嬲,而家係咪要落個 Tag 係「然後佢嬲咗我」呀?

次次見到佢啲苦瓜皮同埋痾蛋 Play 我就密集恐懼症 orz

不過可以做到條龍咁有性格,我覺得幾成功吖!即係滅盡龍呢啲傲嬌屬性我覺得好萌架,喺龍結晶之地 16 區營地跳落去,佢未發現你時,成日都好似隻貓咁磨爪仔、周圍喺啲柱度頭頂頂咁,得意到我想叫佢過黎「姐姐摸頭頭~Hand Hand~」咁樣 LOL

黎到呢個時候,唔知各位朋友覺得邊個任務/或者邊條龍最難打,我就一時時,如果專心打,表現係會唔同的;但有時開 PS4 Party 大家掛住吹水,就真係「3貓不是夢」了 Orz

不過比龍打死,我都覺得係自己問題;但係好多時候,自己之所以會避唔切,係因為下面呢兩隻嘢……

麻痺蛙醬

同埋睡眠蛙醬

無論係自己手多撳到佢、抑或唔知點解 Activate 到佢……我永遠唔明,當我拎把麻痺片手都唔係咁輕易地痺到一隻龍嘅時候,人仔細細(?)嘅麻痺蛙居然下至雄火、上至古龍都可以痺得到嘅呢?到底係有幾強力呢?呢啲咁嘅強力炸彈仲要係通街都有,係真正嘅隱型殺手囉 OK?根本佢先係成個遊戲嘅 Boss,real dark force!

另外一個有關《MHW》嘅新玩法就係「捕獵網」。

話說拎呢個捕獵網去打龍呢,都會有1~2點傷害架,首先你唔好問我點解要咁做,你覺得我咁做好無聊?我話你知咩叫真正無聊兼乞人憎:我同隊友去打炎王龍,打到佢返去瞓覺時,大家想佢全身部位破壞,咪一人兩粒「大爆彈G」圍住隻炎王,然後等最高攻嘅隊友去引爆啦!呢個時候,用充能斧用到出神入化嘅 VJG 總編大人就衝埋黎,我地諗住佢開大絕啦,點知佢用個死人捕獵網打醒隻炎王龍………

不過總編大人之前都有「大家等佢開大技,佢衝埋黎結果去咗掘礦」嘅卑劣紀錄,所以,大家揀隊友時,都係建議多加提防啊。

鬥技場:變左四條友用捕獵網互相攻擊

我嘅最新進度係:終於的起心肝同朋友去打日版 USJ 嘅任務,臨近新年打呢啲刷錢任(笑)真係好鬼開心,係真・遍地黃金( 心)雖然刷出黎嘅素材係下位嘢,不過拎去賣錢都好吖;而且任務限定嘅蒼星碎片仲可以整件貓裝~

USJ 任務限定仁王裝(誤)係武士啊~

黎緊新春假期,各位獵人朋友我地有緣就在遊戲裡面見喔!《MHW》呢個遊戲係玩唔完的,我而家都仲未刷到素材去再解放我嘅重弩,獵人嘅路,仲係好漫長……

刷唔到刷唔到刷唔到

不過,《新手 MHW 日記》黎到呢一次嘅番外篇就暫時告一段落了,去到下次出 DLC 打恐暴龍時或者會連載再開!(再寫我怕大家睇得悶啊 orz)

神婆在此先祝願各位獵人新春快樂,狩獵順利!

前文回顧:新手獵人日記第一章
前文回顧:新手獵人日記第二章
前文回顧:新手獵人日記第三章

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章