出咗一段時間既《Dragon Ball Fighter Z》除咗得到各方大量正評之外，銷量亦都屢創佳績，甚至係外國論壇被喻為史上最佳既龍珠格鬥遊戲。不過有玩開既玩家一定發現一個問題，就係好多時同朋友係無法連線對戰的，而呢點對於格鬥遊戲黎講絕對係致命傷黎，好在日前 Bandai Namco Entertainment 正式宣布會發佈兩個更新檔黎修復，未入手既朋友可以放心買啦！

《Dragon Ball Fighter Z》製作人廣木朋子小姐係片中講到首個更新檔將會係今個月尾正式發放，不過呢個更新檔修復既係玩家配對時候同對戰大廳斷線既問題；而第二個更新檔就會係三月中到三月尾左右發放，呢次就會修復多人連線對戰問題啦，大家趁住呢段時間打 Ranking 練住等啦！