【遊戲感想】《Bayonetta 2》當年落 Wii U 真係好可惜(喂)

《Bayonetta 1&2》早前一口氣兩集一齊移植 Switch,可能有朋友話「咪又係炒冷飯」所以未必太留意,但係今次我又唔係咁認為啊,《B1》就話當年落 Xbox 360 同 PS3 所以多朋友玩過啫,但係《B2》當年獨佔嘅機種,係香港應該好少好少人買到嘅 Wii U 啊(抖)

記得出 Wii U 嘅時候,我曾經因為好想玩《零〜濡鴉ノ巫女〜》而入手(Yes 我係《零》系列忠實 Fans!雖然應該唔會有新作了orz),不過最後都係打消咗呢個念頭,原因係部 Wii U 真係唔係咁吸引我……結果呢部機亦都無聲無息地成為歷史嘅一部份了。

Anyway 個人喜好就唔講太多,然而,我相信好多朋友同我一樣,黎到 Switch 先叫做有機會玩《Bayonetta 2》,咁到底呢隻移植版又值唔值得入手呢?

老老實實,唔值得嘅話,我先懶得開篇文黎寫,哼!(喂)

憑住《B1》省靚咗招牌,加埋白金工作室出品絕對有質量保證(白金=舊年我吹捧到天上有地下無嘅《Nier: Automata》嘅製作室啊)我抱住玩新 Game 嘅心情,開始咗魔女嘅遊戲。

面對住自戀得黎好有型嘅 Bayonetta 大姐,我心動了

《B2》故事主線承繼住《B1》嘅劇情,繼續講緊 500 年前獵巫行動嘅真相,不過劇情發展就非常緊湊,有失憶、有靈魂墮落地獄、有雙子 Play、有時空穿梭 Play,再加埋啲超激烈、流暢、爽快、炫麗嘅戰鬥動作過程……痴線,好玩到我上咗地鐵幾乎 Miss 咗個站先落車!詳細內容我就唔講太多,留返比大家玩嘅時候慢慢睇~

Bayonetta 嘅工作(?)本來就係要獵殺天使

上集嘅貞德大姐今次有半集時間係等 Bayonetta 拯救

《Bayonetta》系列嘅好玩之處,除咗戰鬥動作系統做得極好之外,畫質靚自然不在話下,但遊戲過程中仲有啲探索以及收集「碎片」嘅元素。

準備越過「神聖之山」到違「地獄之門」:個場景靚到…

探索多樣化:B 姐可以變身其他動物橫行海陸空(心)

咁當然啦,遊戲唔係 RPG,所以並唔會有咩打怪升 Level 嘅設定,Bayonetta 自身嘅攻擊力基本上是 Default 咗的,如果想角色變強,就要入「商店」購買「技能」或者其他道具。

樣樣嘢都好貴嘅黑店(誤)

買技能可以增加攻擊或反擊技

即係咁,戰鬥打得好,跌嘅錢就多啲;而每個故事 Chapter 綜觀戰鬥都表現良好嘅,就仲會有埋 Bonus 獎勵添!每一關卡會有嘅戰鬥次數亦都係設定好的,有耐性嘅玩家當然可以狂刷同一章劇情黎刷錢,不過會好花時間咁解(喂)

探索時破壞場景都會跌錢或道具,不過數量唔多,所以,想刷錢,當然就係出動 Amiibo 嘅時候啦LOL!

我無嘢多,Amiibo 就有好多!

一日可以用 32 次唔同嘅 Amiibo 呀,每隻都會派錢架,仲會送道具甚至解鎖限定外觀服裝!記得 Switch 剛剛推出時我為咗有充足道具玩《Zelda》真係買落唔少 Amiibo,無諗過而家大派用場!條數抵返哂!LOL

不過啲外觀服裝全部都散發住一陣 Kuso 味……你地睇下我用完《Zelda》Link 嘅 Amiibo 之後,佢比啲乜嘢我……

Link 哥哥的惡趣味,好核突(掩面)但係用呢套衫可以送特別技能,官方好卑鄙啊~

比較正常嘅服裝

不過就算刷錢刷到變二次元富豪,都唔代表可以稱霸每場戰鬥的,老老實實我自問唔擅長動作遊戲,以前都係打 RPG 或者係 AVG 多(女性向的東西,你懂的orz),所以都係近幾年先努力逼自己練習多啲……

《Bayonetta》戰鬥可以揀難度,唔同難度最主要嘅分別係 HP 值有幾多,我第一關試手勢時好無用咁揀咗 Easy,買多幾個技能傍身、操控熟手咗之後就轉返上 Hard。

結果,我膽粗粗唔補血嘅後果,就係玩到死下死下,係咁紅血。

「果然只是有錢也不行啊!!」我個心咁樣吶喊,然後,我唯有唔再心急衝劇情,乖乖地每場戰鬥都打醒二十萬分精神黎玩,練習唔知幾多次之後,其實……又唔係真係咁難打,無論天使又好魔物又好,個攻擊模式其實都有一定嘅 Pattern,之前我打得咁差,下下都拎銅牌,一定係因為我無拎個心出黎戰鬥,我唔配做魔女。

不過啲魔物真係好鬼肉酸orz

戰鬥唔集中精神點得?有時仲會有限時按鍵指令架 LOL

正當我玩得如火如荼嘅時候,有時我都醒唔起佢係一隻舊作移植,超敏捷嘅動作以及靚到炸開嘅畫面,你話佢係今年新出嘅遊戲我都信!

魔女處決絕招動畫真係睇幾多次都覺得型

同埋,就算唔講系統部份,個故事本身個設定都夠吸引,唔知大家對於「天界」「魔界」「罪」呢啲題材有幾大興趣,不過我自從細個睇完套少女漫畫《天使禁獵區》之後就對「天界戰爭」呢個題材一直難以忘懷,所以打從我知道《Bayonetta》故事要對抗天使又要打惡魔之後,對唔住,個人喜好,呢方面我會比故事分極高分的(喂)

所謂「天使」

B 姐的故事仲未完~

如果你本身有玩哂兩集《Bayonetta》但都仲睇到呢一度嘅話,多謝你包容我呢個初心玩家嘅稚嫩(合十)至於未玩過嘅朋友,如果打《MHW》打到悶悶地,真係不妨拎返你部可能封咗塵嘅 Switch 出黎,一口氣玩哂兩集《Bayonetta》!第三集今年唔知會唔會出到,不過官方之前都釋出咗 Trailer,喺文章最後嘅呢度,同大家分享返先:

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。首本個人塔羅散文今年書展上架:shorturl.at/iDMWY

追蹤

Facebook 更多文章