有留意開電競選手新聞嘅朋友，一定會聽過 Dogura 同埋 Daigo（梅原大吾）嘅大名！兩位都係世界上享負盛名嘅格鬥遊戲選手，例如今次提及嘅 Dogura，佢目前喺 Capcom Pro Tour 排名全球第七架！

Dogura 上星期（3月4日）就同女友拉埋天窗，首先真係恭喜佢大婚之喜！咁可能你會問「恭喜完又點樣，結婚有咩特別啊？」，特別嘅地方就係：佢喺婚禮上面依然 Set 咗 Playstation，普通人結婚可能都係唱吓歌、玩吓遊戲，但係佢係選手黎架嘛！所以，表演活動當然係要同班選手朋友落場玩返舖！

Daigo 與 Dogura 明顯心情愉快

最有趣嘅地方係：Dogura 已經唔係第一個選手喺婚禮上搞比賽直播，早佢兩個月結婚嘅另一位日本選手 Haitani（全球排名第五）已經做過呢樣嘢！唔知呢種玩法會唔會成為往後選手結婚嘅傳統環節呢？

平時睇《Street Fighter》比賽上面見到嘅選手們都係一臉嚴肅，今次喺婚宴上面就明顯見到各人輕鬆嘅一面啦！梅原仲為 Dogura 準備咗一份禮物，就係當日佢打機直播同時係募集緊贊助，賺到幾多就轉送哂比兄弟做結婚禮金咁話！

不過最不得了嘅，一定係 Dogura 太太，老公喺婚禮上面咁樣玩，可能你會以為佢唔係好高興？相反！佢不知睇得幾開心，或者佢身上面嘅紋身都可以睇得出點解佢咁玩得……

Twitter @maneater_dgr

太太身上嘅紋身係《Guilty Gear》嘅 Testament；而《Guilty Gear》同時係老公 Dogura 玩得非常出色嘅遊戲之一！支持老公到咁嘅地步，真係太 Sweet 了～

在此再次恭賀 Dogura 大婚之喜啊！