經典獵奇作品《寒蟬鳴泣時》以及《海貓悲鳴時》，大家就算無玩過遊戲，都應該有睇過動畫！呢兩套由「竜騎士07」創作嘅作品，集合都市傳說、人性險惡、精神獵奇、恐懼血腥多種要素，遊戲雖然只係 AVG，但係引人入勝嘅劇本，令到作品一直人氣高企，當中嘅《寒蟬》亦都係我個人極為喜愛嘅作品，玩到後期都咪話唔心寒！

「竜騎士07」剛剛就宣佈：呢兩套咁經典嘅遊戲，黎緊都會高清化落 Switch！《寒蟬》發售日為 2018 年 7 月 26 日，夏天玩《寒蟬》真係非常配合遊戲中嘅氛圍，未玩過嘅朋友，我真係強烈推介你落坑，到時當睇小說咁樣，一定有消暑效果（笑）

主題曲將會由志倉千代丸創作，係志倉老師呀！超級期待！

至於《海貓悲鳴時》嘅正式發售日目前就未有公佈。不過，兩套作品推出時都會係「完全版」嘅 Package，即係遊戲所有章節（當年係分開賣的）同埋劇本都會 All in one 咁樣呈現比玩家～就算係以前玩過嘅朋友都可以考慮買黎做一個正式收藏！（無錯，我應該會咁做 LOL）

不過，最令我興奮嘅消息，絕對係呢樣：工作室終於有全新作品面世啦！

呢套《惨劇サンドボックス》目前所有資料都未公佈，「竜騎士07」就話目前已經寫好八成劇本，遊戲預計 2019 年正式面世，絕對會係一套「不遜於前作」嘅作品咁話！

淨係有新作品呢個消息，已經令我開心到跳起 Yeah了！不過，相信更多玩家好奇嘅係，呢幾套作品而家登錄 Switch 平台，唔知會唔會推出埋日文以外嘅語言版本呢？

有最新消息我再同大家跟進！而家就期待下先啦～

最後送上 Switch 版《寒蟬》嘅 Trailer（有埋新主題曲試聽架～）：