【遊戲感想】《二之國 II》絕對係 2018 年 RPG 近乎完美之作

2016 年我強推《Persona 5》,2017 年我強推《Nier: Automata》;黎到 2018 年,我諗,《二之國 II》絕對係我今年必推嘅 RPG 遊戲。《二之國》系列之前嘅作品,分別出喺 NDS 以及 PS3上面,今次係第一次登錄 PS4,而今次呢隻《王國再臨(Revenant Kingdom)》亦係我第一次接觸呢個遊戲系列。

唔玩猶自可,一玩,驚為天人。

咁當然,我評價咁高,當然有好大私心!遊戲由 LEVEL-5 開發,人設由吉卜力出身的百瀬義行先生設計,所以遊戲中充滿住滿滿吉卜力味!講起吉卜力嘅話,直至《哈爾移動唔到城堡》呢一部為止嘅動畫作品,一直都喺我成長路上佔住好大嘅位置。未開始玩彈出彈入之前嘅宮崎駿,作品巧妙地交織純真與狂想……如果你同樣懷念呢一份感覺,《二之國 II》絕對係不二之選,去比你搵返失落嘅(?)率真。

仲有一樣嘢係:音樂部份由久石讓擔當架!係久石讓大師呀!一講起佢個名,我成個腦即刻響起好多主題曲旋律,仲有少少眼濕濕添。

嗱,講真,成個遊戲入面嘅 BGM 都係久石讓大師作品噃,如果你去唔到佢喺香港個音樂會嘅,唔緊要,玩《二之國 II》頂頂癮都得架 LOL

遊戲主線好簡單易明:正太王子生活無憂,一夜之間,國王父親被奸臣謀算而死,被逼流亡;同時,喺另一個世界入面嘅大總統,因為時空交錯,穿越黎到正太王子身邊。

咁呢兩個人就開始結伴,嘗試去建立一個新嘅國家,一路上招兵買馬……OK 我意思係正太王子吸引咗唔同嘅賢能之士去加入佢嘅隊伍(笑),但喺旅途之中,慢慢發現呢個世界似乎到處都出現咗唔妥,原來無論係自己國家,抑或其他國家,都係因為邪神之力,搞到周圍都亂糟糟。

睇到呢度,你可能會話:喂,聽落好似好老套,反正最後都係正義必勝架啦?

我只可以講,係就係嘅,最後係正義必勝嘅,不過邪神之所以會出現,原來只係因為一個好可悲嘅原因、只係一份好無奈嘅執著。

《二之國 II》故事嘅結局,表面上黎睇都係大團圓+大和解嘅;不過,要離開的始終要離開,逝者已矣,珍惜現在或者都係故事其中一個想帶比玩家嘅重點。

突然好認真,對唔住 orz

OK,大道理小意義嘅嘢唔講太多,始終大家對遊戲嘅感受未必一樣的~不過,如果我話《二之國 II》遊戲性極高,高得黎仲豐富得好痴線,應該無人會反對啩?(乖,反對嘅忍住唔好舉手)

遊戲非常貪心,有齊探索、解謎、收集、建設、育成、戰略、動作咁多種元素(應該無數漏 LOL)籠統啲講句,真係會滿足各種喜好嘅玩家!神奇嘅地方係,遊戲元素雖多,但於遊戲中嘅應用渾然天成,唔會突兀,各個元素之間都有唔錯嘅平衡,「多嘢得黎唔會亂」,呢一點都係我強力推介呢個遊戲嘅原因~

探索大地圖時係粒粒人仔

進入城市、迷宮就變返大粒

解謎元素:都要用吓腦仔的~

戰鬥方面係好玩嘅,呢個係一個講求技巧嘅遊戲,打得有技術嘅朋友,例如係觀察敵人攻擊方式及密度、小心自己走位等等,你越級打勁 Boss 都絕對可以!如果係「唔鍾意回合制,所以唔想玩 RPG」嘅朋友,喂,今次呢個戰鬥設定,你真係無藉口唔玩喇噃~LOL

戰鬥:攻擊分為近攻及魔法

有屬性相剋

不過講到明而家係少年建國,國呀,有國就有軍,所以仲有另外一個戰鬥模式,係用軍隊戰的~開頭玩會覺得少少難,但掌握咗啲武器相剋嘅屬性之後,行軍打仗就變得無難度了(好似係)

呢種玩法 喺 RPG 遊戲入面唔常見,所以都幾驚喜的;不過去到遊戲後期,假設要好似《幻想水滸傳》咁(年紀曝露!)搵齊哂國家啲國民,呃,我重申,是總數為 100 個的國民……嘅話,大家就要有心理準備會有好多仗要打 orz

講起 100 個國民……陰公,我覺得自己居然有心機清哂啲支線+搵哂 100 個勞工(!)返黎建設國家都真係幾痴線的,呢個遊戲如果直衝主線,一啲都唔難唔煩架,9 個 Chapter,情節乾脆俐落。

但係,如果你要清埋啲支線 / 想盡力建設五星級的家比啲國民 / 想搞好基建(即係做好軍備呀、學技能呀、收集珍貴資源等等)嘅話,係絕對會令你有種「見唔到終點」嘅感覺的 orz

國家中期面貌

Upgrade 國家要錢又要人,漫長嘅支線道路,就係咁開始的 orz

王國初期走原始風(笑)

不過收集「魔法精靈」呢一方面我就玩得好開心~

精靈之母(誤)真係非常有吉卜力嘅味道!個感覺好似千尋帶無面人去搵湯婆婆個姐妹嗰一幕咁(笑)

不過,成個遊戲入面,我最鍾意嘅,唔係正太王子,亦唔係美男子羅倫,而係呢隻勁似《哈爾移動城堡》入面隻卡西火嘅守護神 BB!有點白目的性格、把口又臭臭地,啲表情同對白,真係好鬼抵死又好笑!官方可唔可以出守護神毛公仔周邊?好鬼想要呀喂!

喺國家建設入面可以加強佢嘅技能

遊戲入面仲有好多收集要素,例如係搵齊啲精靈、整齊啲裝備等等,如果你同我一樣有強逼症,絕對……絕對會玩到欲罷不能,因為要儲嘅嘢真係太多!

仲有,喺拎到船同埋飛行船之後,仲會發現個地圖上面有好多隱藏迷宮同埋地區 Boss,真係多嘢到痴線,或者應該咁講,係抵玩到痴線!LOL

總括黎講,我比《二之國 II》嘅評分真係好高,佢令我重新記起「自己當年愛上玩 RPG 遊戲」嘅嗰種激動以及大開眼界嘅感覺!遊戲目前中文版仲未出,或者會令好多玩家因此而卻步,但係呢隻真心係好 Game 黎,如果識得粗略日文嘅,心動不如行動;如果忙碌未能抽身嘅,唔緊要,遊戲出中文版嘅時候,我一定會再同大家講聲的。

這是一隻值得玩的好遊戲,真心好想讓更多朋友玩到:)

謝謝你睇到呢度,今次篇感想有啲長(笑)
不過如果你有興趣開 Game 嘅,可以順便參考埋我之前寫嘅三份攻略呀~

相關文章:
【二之國 2 攻略】魔障氣敵人位置及等級・圖文一覽
【二之國 2 攻略】夢幻迷宮全地點及解鎖位置・圖文一覽
【二之國 2 攻略】全地藏位置+對應供奉材料圖文一覽

最後為大家送上遊戲 Trailer,簡直有吉卜力動畫質素嘅既視感!

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。首本個人塔羅散文今年書展上架:shorturl.at/iDMWY

追蹤

Facebook 更多文章