【送禮一流】惡搞味濃!SEGA Saturn……造型嘅體重磅登場!

大家去日本旅行時,應該時不時都會比各種「惡搞得黎好認真」嘅產品搞到哭笑不得,今日介紹呢舊嘢,我之前見咗幾次,一直都以為係網友惡搞,但係無諗過原來係實物 Product 黎 LOL

有啲機齡嘅朋友,一定有聽過玩過 SEGA 當年部家用機「SATURN」,呢部出產於 1994 年嘅經典機種,喺當年都曾經瘋魔一時,係唔少機迷嘅回憶。唔知係咪時興懷舊,SEGA 居然玩嘢地同 TANITA 合作,推出呢部以 SATURN 外觀嘅體重磅,日本當地目前瘋賣中 orz

呢個磅之所以會推出,一來係本住「打機都唔好忘記自己嘅健康呀~」嘅精神,另一樣呢,就係要啲用家檢討下呀,你地當年玩緊 SATURN 嘅時候係幾 Fit 幾健康呀?隨住時間過去,而家係咪又殘咗好多呢?咁樣唔得架噃,要做運動減下肥喇噃!

……喂,上面呢堆唔係我講架,係官方宣傳文案黎架 LOL

不過呢部 SATURN 體重磅係限量架!當年 SATURN 遊戲機推出時係 11 月 22 日,所以體重磅嘅貨量都係得 1,122 部,網上預約一出就已經賣哂了,如果有朋友咁啱去日本,就記得留意下啦!

雖然賣哂,不過官方放口風話會返貨,所以貼埋網購傳送門

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章