《魔物獵人:世界》 爛輝龍 凱羅武器檢評

凱羅武器剛面世不久時,好多玩家;特別係台港嘅討論區;個著眼點仍然係「無擊、無擊、無擊」,跟住就「垃圾、垃圾、垃圾」咁批評凱羅武器。個思維並無隨3.0嘅爛輝龍更新而更新,但其實凱羅武器擁有非常強大既潛力,以下為大家講解:

 

考慮 R8凱羅武,請用屬解為前題去考慮;暫時來講大劍、太刀、長槍(因為太綁裝、屬解後唔夠出屬會)係比較低意欲;想玩屬性/異常控場,屬解凱羅都比現存好用。

先寫我有玩,而且又特別出眾嘅 凱羅重弩:

散彈:R7 凱羅重弩·賊/偏移中/270攻(可無擊) 散3基本6發,屬解後8發;一個反動部件下變反動小。 無論彈數、反動、攻擊力都壓倒滅盡、蠻顎; 標準防性5、屬解3、弱特3、散彈強化下,打滅盡頭可以平均一發散彈40*6,而且絕對舉得切盾。

 

貫通:R8 凱羅援擊弩/無偏移/270攻(不可無擊) 貫3基本6發、屬解後8發;一個反動部件下變反動小。 彈數贏風飄1發,攻擊力風飄255;援擊完勝風飄。

 

通常:R8 凱羅爆擊弩/偏移大/285攻(可無擊) 通3基本5發、屬解後7發;一個裝填部件後變正常裝填速度。 彈數、裝填同R6嘅骨弩一樣,偏移稍輸骨弩;不過呢把基礎攻擊力同會心,等同客製2攻擊/1會心後嘅骨弩,變相其實多一個客製位。 再者爆擊弩有得用擴2/擴3/撤甲3,雖然用呢3種彈比唔上恐暴重弩,但爆擊弩起碼連通常彈3都打得,變相唔洗太綁冥燈裝,同時可以係一支可以用嘅泛用型擴散通常兼用弩。 暫時來講,重弩就呢3把可以登上彈種最強弩嘅地位。

 

 

凱羅輕弩呢,當然要先望望各自速射:

凱羅狙擊弩係 雷彈、通2嘅速射。

 

凱羅迫擊弩係 水彈、冰彈嘅速射,只不過,水屬性而言的話,凱羅慘爪或原版泥魚輕弩可能更好。

 

凱羅射擊弩係 通2(可無擊)嘅速射。

 

 

capcom都見到因為怪嘅肉質偏軟加上無擊,連本來主力屬性彈嘅輕弩都偏向用無屬性弩;所以一次過補充屬性速射用嘅輕弩(活躍嘅火龍輕弩又有更強嘅凱羅火龍)。

參照速射火輕弩嘅裝:頭身用火龍/火龍魂、手腰腳用冥燈、覺醒珠;屬會、彈藥節約出齊,有耐衝、珠位、屬解、會心(可弱特或放渾身珠)都夠用,而且有三個一級洞放屬攻珠。

呢套裝夠狙擊同迫擊兩把發揮作用。而屬性彈有幾大作用呢,我哋可以攞爛輝龍做個參考。

(大家個基本認知要有,今集屬性彈係屬性貫通彈)

一彈雷彈貫爛輝嘅尾甲到前甲,單發會心可以3X+3X+1X *n,速射嘅總合傷害總計超過200。咁唔係下下都會心,但傷害已經超前好多物理彈,甚至高屬性嘅近戰武器。

跟住係爛輝解放後個頭,用冰彈單發可以打到40+40+2X*n;解放後,角唔太怕彈嘅物理傷害,但屬性傷害打落去好有力;速射嘅傷害都係超前好多武器。

(官方爛輝試玩嗰場都係用屬性輕弩做示範,其實都係一種提示)

凱羅R8弩解決咗屬性速射從缺或偏弱嘅問題,同時屬性彈係貫通彈嘅有效射程,可以有足夠距離安全輸出。

至於 凱羅射擊弩嘅通2速射,簡單講兩句;數值上強過慘爪,而且爛輝甲出現後,超會心3變得易配,對通2速射輕弩就相當貼心。(而且來緊有弱特2嘅 但丁腳;只需要屬解2嘅通2速射,可以唔用麒麟腳、帝王手)

總括而言,輕弩屬性彈喺「基本上係屬性武器救濟任」嘅爛輝龍裝備上,自然係最受惠。

 

講得屬性彈,梗係要寫埋屬性解放武。

 

凱羅屬解武:我分異常、屬攻兩部份來講。

首先今集無天然嘅強力麻眠武,好多時甚至係唔屬解都無麻、眠武,所以屬解配裝嘅負面影響幾乎唔存在。喺咁嘅環境下,只需要對比凱羅同其他屬解武器嘅數值差別就可以;而且R8凱羅武係一定贏其他屬解武。

而其中比較觸目嘅係,麻蟲棍、爆破片手、麻笛、麻斧;首先呢四類武器本身個控場能力就較強:空戰蟲棍異常高嘅手數、片手流暢嘅攻擊、笛必上異常嘅音擊同埋同樣必上異常嘅斬斧瓶傷害

凱羅嘅異常狀態武本身送三級洞畀你插解放珠,而且不論屬性、攻擊力、斬位,都比其他異常狀態武高。所以凱羅嘅屬解武完勝;就連笛嘅音色同女王蜂笛一樣,所以唔洗比較音色。

 

如果凱羅重弩有妖物,咁呢把凱羅麻棍就係神器;有玩mhxx,大概會記得後期差唔多定番每場最少一個麻蟲棍控場,騎麻暈循環;所以今集要屬解先畀你用,而且屬解蟲棍來講,得佢上唔到白斬,不過有足夠長嘅藍斬等你直接唔洗諗匠同剛刃。

 

題外話:傳說,今集蟲棍分開咗地面物理流、空中屬性流;因為地面同空中嘅手數及動作值差異好大。而由於麻棍嘅封印,以及弱特嘅容易配裝(對比屬解),空中屬性流一直無法得到應得回報;所以空戰蟲棍落得「一世打唔完棍」嘅污名。

但凱羅麻棍以及凱羅防具(特別係凱羅手),就係重現「控場:騎麻暈」嘅一把神兵利器。

(而且空戰有飛燕可以將異常同屬性1.1倍提高超過屬性上限)

凱羅屬解武(屬攻)都有三級洞基本上預你插一粒解放珠;喺屬解配裝難度下降下,其實只要睇數值比對就知強喺邊。

最受益嘅一定係本來就有砌開屬解屬會裝嘅弓;裝都唔洗砌過,用返勇氣水弓個套就可以。再者,凱羅出嘅水弓仲要比勇氣弓更高屬性及攻擊力,根本只要刷到一定轉。

同樣,弓用同一套裝,可以套用落去凱羅雷弓上面;喺麒麟弓從缺嘅 MHW 裡面,犧牲麻痺瓶換比飛雷弓更高雷傷物傷,其實係一個輸出同控場之間嘅選擇。

 

講近戰屬解武器前,我要特別提一提爛輝凱羅腰alpha,屬解1匠2;佢嘅存在令到「用麒麟腳要犧牲死神腳匠2」個問題減輕,甚至唔存在。同時間減低屬解後,配出火龍裝屬性會心嘅難度。

 

承上,蟲棍空戰有飛燕加成、且手數多、但動作值低,理論上空戰蟲棍屬性應該可以幾標青;可惜嘅係佢屬武唔係斬味低,就係屬性值都低…凱羅屬解棍,就斬味、屬攻都上乘仲送埋高物攻(限水、冰;至於火、雷就望下R7版本嘅非屬解);連埋麻棍回歸來睇,爛輝龍裝備令蟲棍可以一吐烏氣。

 

雙刀,爛輝龍出之前已經有人實測過屬會高出無擊角龍約5~11%嘅傷害(MH傷害10%已經係非常大嘅差距),但情況同弓、蟲棍一樣,因為高屬性值嘅武器從缺,所以一直有配裝麻煩嘅情況。

凱羅冰雙刀嘅冰屬性值等於冰爆雙刀,但實際上因為冰爆雙刀只有右手係冰屬,所以冰爆嘅屬性值直接減半;所以水冰凱羅雙刀的確係來填補屬性武器從缺嘅位。

喺屬解屬會近接裝嘅組裝難度下降後,蟲棍同雙刀屬性流,終於可以不負佢哋手數武器之名。

屬解片手可以參考好兄弟雙刀。

 

 

跟住講講比較特別嘅笛,凱羅笛係 MHW 至今唯一黄橙音嘅笛;除咗麒麟笛黄綠音之外,就只有黄橙音吹得出屬攻up。當你嗰隊普遍係屬武時,而條龍又弱龍/水,你就大可以幫呢兩把凱羅武屬解,同時支援隊友又令到支笛同音色合拍;你唔屬解齋吹屬攻up個貢獻,仲低過你用恐暴吹攻大防大/無擊骨笛上前打。今集笛重奏嗰下唔單止高攻,仲係手數高,屬攻唔會太差,但要留意音擊唔會會心,屬解笛裝無必要組屬會;但仍推薦弱特,因為笛嘅物理攻擊力仍然係武器中數一數二高。

斬斧嘅超出力狀態,同笛類似:瓶傷害(而且係強擊瓶)與音擊一樣唔會會心;所以一樣屬解裝無必要綁屬會,而且爛輝凱羅手嘅強化持續對超出力狀態有好好嘅維持作用,值得留意。

笛嘅好兄弟槌仔呢,假如閣下係爆旋陀螺fans/滑坡槌手,的確手數比例上會值得用;其他情況下,我會放棄凱羅武。

至於其他屬解武,大劍、太刀、盾斧,即使強過原本嘅屬性武器,但由於大劍系非常側重物攻、屬解斧並非屬性瓶等設定因素,基本上辛辛苦苦砌套裝都唔會有突破。

至於我嘅本命武器長槍呢,就其實本身除水、龍屬外,根本唔太缺強力屬性武器;再者佢屬解後雷槍一樣無法白斬。本身長槍裝備就好多必要技能,弱特、屬會、鐵壁3、強壁、耐衝、匠、剛刃…喺裝備卡到死嘅情況下,要砌到屬解3係一定要強壁珠嘅…極限可以組出「攻擊4/超心1+體力3、屬解3、屬攻3、匠2、剛刃、鐵壁3、強壁、弱特3、屬會」;水屬會強過泥魚好多,但雷屬只係稍強於麒麟。

 

另外,我想幫 MHW 中,成日受批評屬性上限講返啲好說話,以往要用到「X屬性+2」、「屬性攻擊強化」先可以做到1.3倍屬性嘅效果,今集個屬性上限其實都係同等而無弱化到;反而屬性上限保障咗高屬低攻嘅武器個價值,以及一個誘因令人屬性解放出高攻高屬武器。

 

 

跟住係銃槍,銃槍嘅比較重點並唔係屬解,亦都唔係屬性;係喺炮擊LV4後嘅武器互相比較。

R8嘅凱羅眠銃,炮擊:通常4,同櫻火銃一樣437攻擊力,但少15%會心同一次客製,亦都無毒屬;睇落輸櫻火,但可以裝無擊珠,而且炮擊唔上毒,喺無擊強化到龍杭炮嘅斬擊傷害下,係穩贏櫻火銃。

由於我本人鮮有去接觸銃槍,喺日本討論區所見,結論就係呢把凱羅眠銃完勝櫻火銃。

 

擴散銃就無得拗㗎啦,因為凱羅銃先存在擴散4銃。凱羅水銃有擴散4,437攻可以無擊;擴散銃打法上比通常自由,屬於邊打邊炮嘅短硬直打,基本上擴散4嘅出現,係令到「純斬流」進化做「斬炮流」所必需。

最後係原本只此一家嘅熔山龍放射4銃,喺凱羅王銃登場後,終於有競爭對手。除咗有純蓄力邪教會用金色王銃,凱羅王銃嘅斬味比熔山長更加係優點,而且藍斬相對無咁易彈刀,可以做埋斬擊同龍杭等更進取打法,無需將放射銃侷限喺蓄力炮下就已經係放射銃一個突破。

 

最後,重振屬性武器、手數武器嘅,唔只係屬解凱羅武器,仲有爛輝龍本身。無論軟化與否,爛輝龍係弱屬多過弱物,單單係屬性輕弩/弓/蟲棍攻略速完勝其他武器,就已經係屬性武器吐氣揚眉嘅一個大更新。

 

古渡

《Pokemon XY》400小時遊玩時間,天梯賽1700以上嘅非專業玩家。閒時會寫下嘢咁

追蹤

更多文章