動保組織又獻新猷 今次中槍既係《Far Cry 5》

大家仲記唔記得之前有單野,係一隻黑冠獼猴自拍,然後就有個動物保護組織 PETA 走去告相機持有者,聲稱隻黑冠獼猴 Naruto 先係相片版權持有者。不過係早前美國法院已經判咗個攝影師勝訴,但係 PETA 就汲取唔到教訓,最近又有新搞作。今次中槍既就係推出無幾耐既《Far Cry 5》,而槍口對住既竟然係遊戲入面既釣魚系統!

呢張相大家有無印象呢?

 

話說 PETA 早前出咗份聲明,佢地認為係《Far Cry 5》入面釣魚呢個行為,會令人忘記釣魚呢項活動對魚類造成既傷害,以及對佢地所面對既痛苦。

「釣魚呢個行為意味住將魚引入陷阱,另佢地係短至幾分鐘,長至幾粒鐘既時間內,處於恐懼及缺氧既狀態,而佢地係被殺之前能做既只有痛苦咁掙扎。」

 

 

成份聲明充斥住一種膠味,當然外國啲 Forum 都係恥笑佢地啦,不過呢類事件其實都唔係第一次。PETA 之前亦都曾經批評任天堂既《1-2 Switch》裡面唧牛奶遊戲,話佢地咁做係損害緊「牛權」,要求任天堂係遊戲入面加入乳牛被強製授精同埋小牛離開母牛時既悲慘叫聲,咁做既目的係令玩家係飲奶果陣,知道牛牛其實有幾慘……。睇到呢度我差唔多想叫大家戒食牛啦,話說我之前經過上水屠房……。

 

我地都唔係叫大家漠視動物權益,但係過晒火件事就會變得非常弱智,好似之前連《MHW》都係虐畜遊戲咁,佢地呢種玩遊戲會漠視生命既講法,其實咪同話人玩《GTA》會周街殺人一樣,大佬,咪咁痴線啦!

順帶一提大家,呢隻咁殘忍,咁暴戾既遊戲已經推出咗,對應 PS4 / Xbox One / PC 平台。

 

回帶相關文章:

【遊戲評測】精彩絕倫警世作品《Far Cry 5》完美演繹末世邪教

係《Far Cry 5》入面打《CS》 超勁外國玩家完美重製沙漠地圖!

 

五木

動漫電玩宅,極愛金田一系列,擅長動作及策略遊戲

追蹤

更多文章